ԱՄՆ-ը, Բրիտանիան, Ֆրանսիան, Գերմանիան եւ Իտալիան հանդես են եկել համատեղ հայտարարությամբ, որում Իրանին կոչ են արել «հրաժարվել սպառնալիքներից Իսրայելի հասցեին»։
«Մենք՝ Միացյալ Նահանգների, Միացյալ Թագավորության, Ֆրանսիայի, Գերմանիայի եւ Իտալիայի ղեկավարներս, քննարկել ենք իրավիճակը Մերձավոր Արեւելքում։ Մենք մեր լիակատար աջակցությունն ենք հայտնել հրադադարի հաստատմանը եւ պատանդների ազատ արձակմանը Գազայում։ Մենք աջակցել ենք նախագահ Բայդենի, Եգիպտոսի նախագահ Սիսիի եւ Կատարի շեյխ Ամիր Թամիմի համատեղ կոչին՝ վերսկսել բանակցությունները այս շաբաթ ավելի ուշ՝ գործարքի շուտափույթ կնքման նպատակով, եւ ընդգծել ենք, որ այլեւս չի կարելի ժամանակ կորցնել։ Բոլոր կողմերը պետք է կատարեն իրենց պարտականությունները։ Բացի այդ, անհրաժեշտ է անխոչընդոտ տեղ հասցնել օգնությունը։ Մենք մեր աջակցությունն ենք հայտնել Իսրայելի պաշտպանությանը իրանական ագրեսիայից եւ ահաբեկչական խմբերի հարձակումներից, որոնց աջակցում է Իրանը։ Մենք Իրանին կոչ ենք արել հրաժարվել Իսրայելի դեմ ռազմական հարձակման իր մշտական սպառնալիքներից եւ քննարկել ենք լուրջ հետեւանքները տարածաշրջանային անվտանգության համար նման հարձակման դեպքում»,- նշվել է երկրների համատեղ հայտարարությունում։
