Արևադարձային «Էռնեստո» փոթորիկը երեքշաբթի հասել է Կարիբյան ավազանի հյուսիս-արևելք՝ թիրախավորելով Պուերտո Ռիկոն, որտեղ իշխանությունները փակել են դպրոցներն ու պետական հաստատությունները, հայտնել է Associated Press-ը:
Երեքշաբթի առավոտյան փոթորիկը հարվածել է մայրաքաղաք Սան Խուանից մոտ 565 կիլոմետր արևելք-հարավ-արևելք ընկած հատվածին: Քամին հասել է 65 կմ/ժ առավելագույն արագության, իսկ դեպի արևմուտք՝ 31 կմ/ժ արագությամբ շարժվել։
«Սա փոթորիկ չէ, բայց անկախ ամեն ինչից, այն իր հետ հորդառատ անձրևներ կբերի»,-նշել է նահանգապետ Պեդրո Պիերլուիսին՝ մարդկանց կոչ անելով մինչև երեքշաբթի երեկոյան ապաստան գտնել:
Նահանգապետի կարգադրությամբ Ազգային գվարդիայի անձնակազմերը կղզու ամբողջ տարածքում այցելում էին ջրհեղեղից տուժած տարածքներ և տարեց բնակիչներին՝ վերջնական նախապատրաստական աշխատանքների շրջանակում:
Օդերևութաբանները նախազգուշացրել են համատարած ջրհեղեղների և հնարավոր սողանքների մասին, նշելով, որ Պուերտո Ռիկոյում և ԱՄՆ Վիրջինյան կղզիներում վեցից ութ դյույմ տեղումներ են սպասվում:
Արևադարձային փոթորկի վերաբերյալ նախազգուշացումներ են արվել Պուերտո Ռիկոյի, Վիեկեսի, Կուլեբրայի, ԱՄՆ-ի և Բրիտանական Վիրջինյան կղզիների, Սենթ Քիթս, Նևիս, Մոնսերատ, Անտիգուա, Բարբուդա, Անգուիլյա, Գվադելուպե, Սենտ Մարտին, Սենտ Բարտս և Սենտ Մարտեն քաղաքներում:
Փոթորիկների դեմ պայքարի ազգային կենտրոնը հայտնել է, որ երեքշաբթի երեկոյան կանխատեսվում է, որ «Էռնեստո»-ն կանցնի Պուերտո Ռիկոյի, ԱՄՆ Վիրջինյան կղզիների և Բրիտանական Վիրջինյան կղզիների վրայով կամ դրանց մերձակայքով:
