Իսրայելի վերջին ագրեսիվ գործողությունների վերաբերյալ Իրանի արտգործնախարար Ալի Բաղերի Քաանին հայտարարել է, որ Թեհրանը պնդում է Իսրայելի դեմ հակաքայլեր ձեռնարկելու իր կարևոր և օրինական իրավունքը, գրում է իրանական Mehr գործակալությունը։
Իրանի արտգործնախարարի պաշտոնակատար Ալի Բաղերի Քաանիի հետ հեռախոսազրույցի ընթացքում Իտալիայի արտաքին գործերի և միջազգային համագործակցության նախարար Անտոնիո Տայանին երկկողմ հարաբերություններն ու տարածաշրջանային հարցեր է քննարկել։
Անդրադառնալով Իրանի և Իտալիայի հարաբերությունների պատմությանը՝ նախարարը գնահատել է տարբեր ոլորտներում երկկողմ համագործակցության և հարաբեդրությունների ամրապնդման ուղղությամբ երկխոսության շարունակությունը։
Գազայում արդեն տասը ամիս տևող պատերազմի և տարածաշրջանի այլ երկրներ պատերազմի տարածման առնչությամբ նա հոռետեսություն է արտահայտել պատերազմը դադարեցնելու Իսրայելի անարդյունավետ մոտեցման վերաբերյալ։ Իրանի արտգործնախարարը հավելել է, որ Դամասկոսում Իրանի դեսպանատան, Բեյրութում բնակելի թաղամասի վրա Իսրայելի հարձակումները և դրան հաջորդած Իրանի պաշտոնական հյուրի՝ ՀԱՄԱՍ-ի քաղբյուրոյի ղեկավար Իսմայիլ Հանիեի սպանությունը «սիոնիստների ջանքերի վառ օրինակներ են՝ պատերազմը տարածաշրջանի այլ երկրներին տարածելու առումով»:
Բաղերին ընդգծել է, որ վերջին ագրեսիվ գործողությունները Սիրիայի, Լիբանանի և Իրանի Իսլամական Հանրապետության ինքնիշխանության և տարածքային ամբողջականության բացահայտ խախտում են։ Նա նշել է, որ Իրանը պնդում է հակաքայլեր ձեռնարկելու իր կարևոր և օրինական իրավունքը՝ շարունակելով Գազայի դեմ ագրեսիան դադարեցնելու իր ջանքերը։
Իտալիայի արտգործնախարարն իր հերթին ընդգծել է երկկողմ հարաբերությունների ամրապնդման և տարբեր ոլորտներում երկխոսության շարունակման կարևորությունը, հատկապես տարածաշրջանային խնդիրների և զարգացումների վերաբերյալ։
Անտոնիո Տայանին ընդգծել է, որ անհրաժեշտ է առաջ մղել նոր նախաձեռնությունը, որում Եգիպտոսը, Կատարը և ԱՄՆ-ը համաձայնության են եկել Գազայի հատվածում հնարավորինս շուտ զինադադարի մասին: Անհանգստություն հայտնելով տարածաշրջանում լարվածության աճի կապակցությամբ՝ նա ասել է, որ Իտալիան բոլոր կողմերից զսպվածություն է պահանջում՝ պատերազմը դադարեցնելու և Գազայում հրադադարի հասնելու համար:
