2024 թվականի կեսի դրությամբ Վրաստանի բանտերում պահվում էր 994 օտարերկրացի 56 երկրից։ Տվյալները ներկայացրել է Ազգային վիճակագրական ծառայությունը՝ հուլիսի 1-ի դրությամբ։ Դա գրեթե յուրաքանչյուր տասներորդն է կամ բանտարկյալների ընդհանուր թվի 9,6%-ը:  

Ըստ NGnewsgeorgia-ի՝ նրանցից 673-ն արդեն դատապարտվել են տարբեր հանցագործությունների համար, մնացածները սպասում են դատավճռին։ Օտարերկրացի բանտարկյալների մեծ մասը տղամարդիկ են։ Վրաստանի բանտերում  պահվում է 95 կին, այդ թվում՝ երկու դեռահաս աղջիկ։

Օտարերկրացի բանտարկյալների մեկ երրորդը Թուրքիայի քաղաքացիներ են, այնուհետև դրանց հետևում են Վրաստանի բանտերում պահվող Ռուսաստանի, Ադրբեջանի, Հայաստանի և Ուկրաինայի քաղաքացիները։ Վրացական բանտերում իրենց պատիժը կրում են նաև ԱՄՆ, Ֆրանսիայի, Գերմանիայի, Իսրայելի և այլ երկրների քաղաքացիներ։