Տնտեսության և խաղաղության ինստիտուտը (IEP) հրապարակել է «Ռազմականացման ժամանակակից թրենդները» զեկույցը, որտեղ նկարագրված են աշխարհի երկրների ռազմական արդյունաբերության մի շարք թրենդներ:

Զեկույցի հեղինակները նշում են, որ երկրների մեծ մասում զինված ուժերի անձնակազմի թիվը նվազել է։ Եթե ​​1995 թվականին աշխարհում զինվորականների ընդհանուր թիվը գերազանցում էր 30 միլիոնը, ապա 2019 թվականին այդ թիվը 28 միլիոնից պակաս էր։

Որոշ երկրներում ընդհանուր ֆոնի վրա նկատելիորեն աչքի է ընկնում 100 հազար բնակչի հաշվով զինվորականների թիվը։ IEP-ի տվյալներով՝ այս ցուցանիշի ռեկորդակիրը Էրիթրեան է՝ աֆրիկյան այս փոքրիկ երկրում 100 հազար բնակչին բաժին է ընկնում 5476 զինվորական։

Այս ցուցանիշը բարձր է ԿԺԴՀ-ում, Իսրայելում, Հունաստանում, Հարավային Կորեայում, Թայվանում, Շրի Լանկայում, Լիբանանում և Հայաստանում (100 հազար բնակչին բաժին է ընկնում 1542 զինվորական): Հայաստանի դեպքում այս ցուցանիշը 2008 թվականի տվյալների համեմատ 100 հազար բնակչի հաշվով աճել է 21 զինվորականով։

Տնտեսության և խաղաղության ինստիտուտը (IEP) պնդում է, որ Ադրբեջանում 100 հազար բնակչին բաժին է ընկնում 649 զինվորական (15 տարվա ընթացքում այն ​​նվազել է 100 հազար բնակչի հաշվով 138 զինվորականով)։ Վրաստանում 100 հազար բնակչին բաժին է ընկնում 551 զինվորական (100 հազար բնակչի հաշվով աճը՝ 74 զինվորական)։