Վրաց-ամերիկյան հարաբերությունները բնականոն վիճակի վերադարձնելու առաջին քայլը պետք է կատարեն վրացական իշխանությունները: Դրա մասին ասված է դեմոկրատ սենատոր Ջին Շահինի եւ հանրապետական կոնգրեսական Մայք Թըրների՝ Վրաստան կատարած այցի արդյունքներով կազմված համատեղ մամուլի հաղորդագրության մեջ։
«Մենք պետք է տեսնենք ազատ և արդար ընտրություններ և բարեխիղճ ջանքեր՝ չեղարկելու համար օտարերկրյա գործակալների մասին օրենքը, որը ԵՄ ինտեգրման ճանապարհին ավելի շատ վնաս է հասցնում երկրին, քան օգուտ բերում։ Հարաբերությունները բնականոն վիճակի վերադարձնելու առաջին քայլը պետք է անի Վրաստանի կառավարությունը, և մենք սպասում ենք նրա առաջարկներին»,- ըստ «Ամերիկայի ձայն»-ի՝ ասված է Ջին Շահինի հայտարարության մեջ:
Միևնույն ժամանակ, սենատոր Շահինը և կոնգրեսական Թըրները վերահաստատել են ԱՄՆ աջակցությունը ԵՄ-ին ինտեգրվելու վրաց ժողովրդի ձգտումներին, բայց միաժամանակ հասկացրել, որ դեմոկրատական հետընթացը և ԱՄՆ-ի հասցեին կեղծ անվանարկումներն անպատասխան չեն մնա:
