Ռուսաստանը Հավաքական անվտանգության պայմանագրի կազմակերպության գլխավոր ռազմաքաղաքական ուժն է։ ՀԱՊԿ-ի մեր դաշնակիցները գիտեն, որ դժվարին պահերին մենք նրանց փորձանքի մեջ միայնակ չենք թողնի։ Դրա օրինակն են 2022 թվականի հունվարի իրադարձություններն Ալմաթիում, սոցցանցերում գրել է ռուսաստանյան սենատոր Վլադիմիր Ջաբրարովը։

«Մեր երկիրը միջազգային ահաբեկիչների հարձակումը հետ մղելու համար ՀԱՊԿ-ի իր դաշնակիցների հետ մի քանի ժամվա ընթացքում օգնության հասավ Ղազախստանի օրինական ղեկավարությանը։ Վստահ եմ, որ եթե Ռուսաստանը բախվի էկզիստենցիալ սպառնալիքի, և մենք դիմենք մեր դաշնակիցների օգնությանը, նրանք մեզ օգնության կհասնեն։

Մենք մեր դաշնակիցներին Ուկրաինայի հետ մեր հակամարտության մեջ միտումնավոր չենք ներգրավում։ Ռուսաստանը միանգամայն ինքնուրույն գլուխ է հանում դրանից, և դա միայն կամրապնդի իր հեղինակությունը ՀԱՊԿ-ում»,- գրել է սենատորը։