ԱՄՆ Կոլումբիական համալսարանի ռեկտոր Նեմաթ Շաֆիքը հրաժարական է տվել՝ այդ պաշտոնում աշխատելով մեկ տարուց մի փոքր ավելի։ Պատճառը պատերազմն է Գազայում, տեղեկացրել է NBC News-ը։
Ապրիլին Շաֆիքը կանգնել է ԱՄՆ Կոնգրեսի Ներկայացուցիչների պալատի կոմիտեի առջեւ, նրան հարցեր են տվել հակասեմականությանն իր վերաբերմունքի մասին։ Հրաժարականի մասին հայտարարությունն ուժի մեջ կմտնի չորեքշաբթի, նշել է Շաֆիքը։
«Ամռան ընթացքում ես կարողացա մտածել եւ որոշեցի, որ իմ հեռանալը այս փուլում ամենալավ ձեւով կօգնի Կոլումբիական համալսարանին հաղթահարել մարտահրավերները»,- գրել է նա։
Տեղեկացված աղբյուրները համալսարանում հայտնել են, որ Շաֆիքը չի կարողացել դիմանալ խիստ քննադատությանը եւ լարվածությանը բուհում բողոքների ֆոնին, երբ դա սկսել է անդրադառնալ նրա ընտանիքի վրա։ Ժամանակավոր ռեկտոր է նշանակվել Կատրինա Արմսթրոնգը։ Նա Կոլումբիական համալսարանի (Իրվինգ) բժշկական կենտրոնի գլխավոր տնօրենն է։
Նեմաթ Շաֆիքը քննադատության է ենթարկվել հակապատերազմյան ցուցարարների եւ Կոնգրեսի հանրապետականների կողմից։ Նա երկու անգամ դիմել է Նյու Յորքի ոստիկանական վարչություն՝ խնդրելով մաքրել վրանաքաղաքները, որոնք ստեղծվել էին ցուցարարների կողմից այս գարնանը, ինչը, ըստ ցուցարարների, պաղեստինցիների հետ համերաշխության ակտ էր։ Այն բանից հետո, երբ Մանհեթենի ճամբարի տարածքից հանվեց առաջին վրանը, դրվեց երկրորդը։ Ցուցարարները վերահսկողության տակ վերցրին Համիլթոն հոլը, եւ Նյու Յորքի ոստիկանությունը հանեց նաեւ դա համալսարանի խնդրանքով։ Մայիսին մի քանի ուսանողներ հավաքվեցին Շաֆիքի տան մոտ՝ բողոքելով եւ բղավելով, ինչը սովորաբար արվում է ավարտական քննությունների ժամանակ։
