Հայոց ցեղասպանության ժխտումը քրեականացնող օրինագիծը չի ընդգրկվել Ֆրանսիայի Սենատի օրակարգ: Այս մասին NEWS.am-ի թղթակցի հետ զրույցում ասաց Ռոն Ալպ նահանգի տարածաշրջանային պատգամավոր Հիլդա Չոբոյանը` ավելացնելով, որ տվյալ օրակարգը ուժի մեջ է մինչեւ ընթացիկ տարեվերջ:
«Ավելին, օրինագիծն ընդգրկված չէ Ազգային ժողովի օրակարգում»,-նշեց զրուցակիցը` ավելցանելով, որ այսպիսով, 2011թ. այդ օրինագծի ճակատագիրը չի կարող վճռվել, քանի որ ստորին պալատի օրակարգն ուժի մեջ է մինչեւ 2012թ. հունվարի 20-ը:
Պատասխանելով հարցին, թե հնարավոր է արդյոք երկու պալատների օրակարգերում փոփոխություններ կատարել, Չոբոյանը հոռետեսական պատասխան տվեց. «Ամեն դեպքում, ժամանակ է պետք, որպեսզի խորհրդարանականների մեծ մասը տվյալ հարցի վերաբերյալ ընդհանուր հայտարարի գալ, իսկ դրանք բանակցություններ, քննարկումներ են»,-նշեց նա:
Ինչպես տեղեկացրել էր NEWS.am-ը, Ֆրանսիայում Հայոց ցեղասպանության ժխտումը քրեականացնող միանգամից երկու օրինագիծ է մշակվել: Նրանցից առաջինը, որը քրեական պատասխանատվություն է նախատեսում ցանկացած ցեղասպանության ժխտման համար, սատարում է նախագահ Սարկոզին: Գործող նախագահի հիմնական մրացկից, սոցիալիստ թեկնածու Ֆրանսուա Օլանդը վերջերս հանդես էր եկել հայտարարութամբ` խոստանալով ընտրվելու դեպքում ընդունել Հայոց ցեղասպանության ժխտումը քրեականացնող ավելի վաղ մշակված նախագիծը:
