նախընտրելի դարձնելԱՄՆ-ն 10 մլն դոլարի պարգեւ է խոստացել «Ալ Քաիդա»-ի գլխավոր առաջնորդներից մեկի` Յասին ալ-Սուրիի գտնվելու վայրի մասին տեղեկատվության համար, որը հայտնի է նաեւ Էզեդին Աբդել Ազիզ Խալի անունով: Այս մասին ասված է ԱՄՆ Պետդեպարտամենտի դեկտեմբերի 22-ի մամլո հաղորդագրությունում:
Պետդեպարտամենտի տեղեկություններով`ալ-Սուրին «Ալ Քաիդա»-ի համակարգողն է Իրանում: Նա կարեւոր դեր ունի ահաբեկչական կազմակերպության համար միջոցներ հայթայթելու գործում եւ զբաղվում է Պարսից ծոցի երկրներում ֆինանսավորման նոր աղբյուրների որոնմամբ:
Բացի այդ, ալ-Սուրին համակարգում է «Ալ Քաիդա»-ի նոր անդամների ներգրավումը, մասնավորապես, ապահովում է Իրանի տարածքով նրանց տեղափոխումը Իրաքի եւ Աֆղանստանի նախապատրաստական ճամբարներ: Նա նաեւ սերտորեն համագործակցում է Իրանի կառավարության հետ եւ ահաբեկիչներին աջակցում է իրանական բանտերից գրոհայինների ազատման եւ նրանց Պակիստան տեղափոխելու հարցում:
Ալ-Սուրիի համար մրցանակը սահմանվել է ԱՄՆ Պետդեպարտամենտի «Մրցանակներ արդարադատության համար» (Rewards for Justice) ծրագրի շրջանակներում:
10 մլն պարգեւ է նշանակված նաեւ «Թալիբան» շարժման առաջնորդ մոլլա Օմարի եւ Իրաքում «Ալ Քաիդա»-ի բջջի առաջնորդ Աբու Դուայի համար:
Ամենաբարձր պարգեւը` 25 մլն դոլար, նշանակվել է «Ալ Քաիդա»-ի առաջնորդ Այման ալ-Զավահիրիի համար:
