Դեկտեմբերի 25-ին կաթոլիկների կողմից նշվող Ծննդյան տոների նախօրեին Սանտա Կլաուսի` եղջերունին լված կառքը` բեռնված 60 հազ. տոննա նվերներով, դուրս է եկել Հյուսիսային բեւեռից:
Այդ մասին այսօր` դեկտեմբերի 24 –ին տեղեկացրել է Հյուսիսային Ամերիկայի աերոտիեզերական պաշտպանության միավորված հրամանատարությունը (NORAD), որի վրա էլ դրված է հրաշագործի ճանապարհին հետեւելու կարեւոր առաքելությունը:
Սանտայի թռիչքը դեկտեմբերի 24 -ին, ԱՄՆ արեւլյան ափի ժամանակով ժամը 02:00-ին (երեւանյանով` ժամը11:00 -ին) արձանագրել են Կանադայի եւ ԱՄՆ-ի ռադարային համակարգերը: Ներկայումս Սանտան ուղղություն է վերցրել Նոր Զելանդիա եւ Ավստրալիա, հետագայում կուղեւորվի Ճապոնիա, Ռուսաստան, Ասիա, Աֆրիկա, Եվրոպա, Կանադա եւ ԱՄՆ:
Մոլորակի բնակիչները կարող են Սանտա Կլաուսի տեղաշարժին հետեւել www.noradsanta.org կայքի միջոցով: Բացի այդ, նրա գտնվելու վայրի մասին տեղեկատվությունը պարբերաբար կներկայացվի սոցիալական Facebook, Tweetter ցանցերի եւ YouTube պորտալի միջոցով: Հնարավոր է նաեւ զանգահարել NORAD-ի գրասենյակ` +1 877 446 6723 հեռախոսահամարով: Հերթապահները կպատասխանեն տեղական ժամանակով ժամը 06:00-ից (երեւանյանով` ժամը 15:00 -ից):
Ծննդյան տոների հիմնական խորհրդանիշի տոնական երթուղուն «հետեւելու» ավանդույթը ծնվել է ԱՄՆ-ում 1955թ-ին, երբ «Սանտա հոթլայն» ընկերության գովազդային հայտարարությունում այդ նպատակով պատահական հեռախոսահամար էր նշվել: Ճակատագրի հեգնանքով դա եղել էր հակօդային պաշտպանության օպերատիվ վարչության պետ, գնդապետ Հերի Շաուպի համարը: Չկորցնելով իրեն` գնդապետն սկսել էր երեխաներին բացատրել, թե զինվորականները կատարում են Սանտա Կլաուսի ավիադիսպետչերի դերը, որպեսզի վերջինս երկնքում չմոլորվի: Ահա այդպես էլ հրթիռային վերահսկողության համակարգը դառնում է հրաշագործի «շտուրմանը», տեղեկացնում է ԻՏԱՌ-ՏԱՍՍ-ը:
Անցած տարի ԱՄՆ-ի եւ Կանադայի զինվորականները պատասխանել են ողջ աշխարհից 80 հազար զանգերի: NORAD-ի դիսպետչերներին այդ հարցում օգնել էին բազմաթիվ կամավորներ, այդ թվում` ԱՄՆ առաջին տիկին Միշել Օբաման: