Վրաստանում խոշոր վթար է տեղի ունեցել` միկրոավտոբուսն ընկել է ձորը, որի հետեւանքով զոհվել է 2 մարդ:
«Գռուզիա-Online»-ը հայտնում է, որ «Ֆորդ» մակնիշի միկրոավտոբուսն ընկել է մոտավորապես 200 մետր բարձրությունից` Խուլո գյուղի շրջակայքում: Այն հայաբնակ Ախալցխա քաղաքից ուղեւորվել էր դեպի Բաթումի:
Երկու ուսանողուհիներ` Կետինո Շավաձեն եւ Նաթիա Օչալաձեն տեղում մահացել են: Միկրոավտոբուսի ուղեւորները հիմնականում ուսանողներ են եղել:
Երթուղային տաքսու ինն ուղեւորներից երեքը ծանր վնասվածքներով տեղափոխվել են հիվանդանոց: Նրանց մոտ հայտնաբերվել են մեծ թվով կոտրվածքներ եւ ներքին արյունահոսություններ:
Վթարի պատճառները հստակեցվում են: Ենթադրվում է, որ վարորդը կորցրել է մեքենայի կառավարումը: Տուժածների բուժման բոլոր ծախսերն իր վրա է վերցրել Աջարիայի առողջապահության նախարարությունը:
