Կասպյան տարածաշրջանում էներգետիկ շահերի բախման հողի վրա հակամարտություններ լիովին հնարավոր են: Այս մասին NEWS.am-ի թղթակցին ասաց փորձագետ, Արտաքին քաղաքականության գերմանական միության Ռուսաստանի եւ ԱՊՀ հարցերով հետազոտական ծրագրերի տնօրեն Ալեքսանդր Ռարը: Նրա խոսքով` բացասական զարգացման հնարավորությունը բացառել չի կարելի, թեեւ «տարածաշրջանում շատ պետություններ հեռու են բանանային լինելուց»:
«Այստեղ բախվում են հզոր դիվանագիտությամբ երկրների շահերը, որոնք տեսականորեն կարող են պայմանավորվել: Սակայն Արեւմուտքի համառ փորձերը` ինչ էլ լինի, շարունակել գազատարը Կասպից ծովի հատակով, հանդիպում է Ռուսատանի եւ Իրանի կտրուկ դիմակայությանը»,-նկատեց փորձագետը:
Նրա կարծիքով` ստեղծված իրավիճակը կարող է նաեւ Լեռնային Ղարաբաղում պատերազմի բռնկման պատճառ դառնալ: «Ինչ-որ մեկի խելքին կարող է փչել, որ Ղարբաղում պատերազմի բռնկումը կարող է տարածաշրջանից ներդրողներին հեռացնելու մեխանիզմ լինել: Կարող է անգամ այդ գաղափարը իրագործելու ցանկություն առաջանել»,-կարծում է փորձագետը:
Ամփոփելով` նա նշեց, որ հավանական սցենարները բազմաթիվ են. «Ըստ էության, գերտերությունները ներկայումս պայքար են մղում էներգառեսուրսների նկատմամբ վերահսկողության համար: Շուտով կարող է տարածաշրջան մտնել նաեւ Չինաստանն իր պետկոնցեռններով, եւ դա ավելի շատ կբարդացնի իրավիճակը... Սակայն առայժմ կոնկրետ կանխատեսումներ վաղ է անել»,-եզրափակեց փորձագետը:
