Հայաստանի ԱԳ նախարար Էդվարդ Նալբանդյանն այսօր` հունվարի 16-ին, ընդունել է Հայաստանի հարցով Եվրոպայի Խորհրդի Խորհրդարանական Վեհաժողովի մոնիտորինգի հանձնաժողովի համազեկուցող Ջոն Պրեսկոտին:
ԱԳՆ մամուլի ծառայությունից NEWS.am-ին հայտնում են, որ ողջունելով հյուրին՝ նախարար Նալբանդյանը բարձր է գնահատել Եվրոպայի Խորհրդի դերը Հայաստանում ժողովրդավարական բարեփոխումների գործընթացում: Նախարար Նալբանդյանը նշել է, որ Հայաստանը շարունակում է իրականացնել Եվրոպայի Խորհրդի առաջ ստանձնած իր պարտավորությունները՝ հիմնված ժողովրդավարության, օրենքի գերակայության եւ մարդու իրավունքների ու հիմնարար ազատությունների պաշտպանության վրա:
Ջոն Պրեսկոտը դրական է գնահատել ժողովրդավարական բարեփոխումների գործընթացում Հայաստանում արձանագրված առաջընթացը:
Զրուցակիցները անդրադարձել են առաջիկայում կայանալիք խորհրդարանական ընտրություններին:
Հյուրի խնդրանքով նախարար Նալբանդյանը ներկայացրեց Հայաստան-Եվրոպական միություն համագործակցությունը:
Հանդիպման ընթացքում քննարկվել են նաեւ տարածաշրջանային խնդիրներ: