Եվրախորհրդի մարդու իրավունքների հարցերով հանձնակատար Թոմաս Համարբերգը հայտարարել է, որ ցնցված է Հրանտ Դինքի գործի դատավճռից:
«Ես ցնցված եմ դատարանի որոշումից: Ես ավելի էի զարմացել, երբ լսել էի, որ դատախազն ու դատավորը եւս դժգոհ են արդյունքից», - Ստամբուլում Եվրոպայում մարդու իրավունքների զեկույցին նվիրված քննարկումների ընթացքում նշել է նա:
Իր զեկույցում Համարբերգը նշում է, որ Դինքը, ինչպես նաեւ Եվրոպայի այլ լրագրողներ, սպանվել են այն բանի պատճառով, որ ուղղակի իրենց գործն են արել: «Անհրաժեշտ է անել ամեն հնարավորը, որպեսզի պատասխանատվության ենթարկվեն ոչ միայն սպանությունն իրագործողները, այլեւ պատվիրատուները»,- զեկույցից հատված է մեջբերում թուրքական Today`s Zaman-ը:
Ինչպես ավելի վաղ հայտնել էր NEWS.am-ը, հունվարի 17-ին Ստամբուլի ծանր հանցագործությունների դատարանը Հրանտ Դինքի սպանության կազմակերպիչ Յասին Հայալին ցմահ բանտարկության է դատապարտել: Մյուս մեղադրյալ Էրհան Թունջելը անմեղ է ճանաչվել սպանության գործով, սակայն դատապարտվել է 10 տարի 6 ամիս ժամկետով` McDonald`s-ում պայթյուն կազմակերպելու համար: Սակայն դրանից հետո դատարանը նրա ազատման մասին վճիռ է կայացրել` հաշվի առնելով նախապես իր եզրակացության մեջ նշված ժամկետը:
Սպանության կատարող Օգյուն Սամաստը դատապարտվել է 21 տարի 6 ամիս ժամկետով, դրան հավելյալ 1 տարի 4 ամիս ժամկետ` զենք պահելու համար: Դատարանի վճռով այդ գործի 19 մեղադրյալների վրայից հանվել է կազմակերպված հանցագործության խմբին անդամակցելու մեղադրանքը:
