Նախընտրելի
ԱՄՆ-ն Իրանին հայտարարել է, որ չի համաձայնի ուրբաթ նախատեսված բանակցությունների վայրը և ձևաչափը փոխելու՝ Թեհրանի պահանջներին, Axios-ին ասել են երկու ամերիկացի պաշտոնյա։
«Փակուղային իրավիճակը կարող է խոչընդոտել դիվանագիտական առաջընթացին և նախագահ Թրամփին համոզել դիմելու ռազմական գործողությունների»։
ԱՄՆ-ն և Իրանը համաձայնել են ուրբաթ հանդիպել Ստամբուլում, որին Մերձավոր Արևելքի այլ երկրներ կմասնակցեն որպես դիտորդներ։ Սակայն երեքշաբթի իրանցիները հայտարարել են, որ ցանկանում են բանակցությունները տեղափոխել Օման և անցկացնել երկկողմանի՝ ապահովելու համար, որ դրանք կենտրոնանան միայն միջուկային հարցերի վրա, այլ ոչ թե՝ այլ հարցերի, ինչպիսիք են հրթիռները, որոնք առաջնահերթ են ԱՄՆ-ի և տարածաշրջանի այլ երկրների համար։
ԱՄՆ պաշտոնյաները քննարկել են վայրը փոխելու խնդրանքը, բայց չորեքշաբթի որոշել են մերժել այն։
Պաշտոնյան ասել է, որ եթե իրանցիները պատրաստ են վերադառնալու սկզբնական ձևաչափին, ԱՄՆ-ն պատրաստ է հանդիպել այս կամ հաջորդ շաբաթ։
«Մենք ցանկանում ենք արագ իրական համաձայնության հասնել, հակառակ դեպքում մարդիկ կսկսեն այլ տարբերակներ դիտարկել»,- ասել է բարձրաստիճան պաշտոնյան՝ ակնարկելով Թրամփի՝ ռազմական գործողությունների մասին բազմիցս հնչեցրած սպառնալիքները։
«Մենք փորձեցինք փոխզիջման հասնել, բայց իրանցիները հրաժարվեցին։ Մեծ հավանականություն կա, որ բանակցությունները այս շաբաթ չեն իրականանա»,- ասել է ԱՄՆ երկրորդ պաշտոնյան։
ԱՄՆ պաշտոնյաների տվյալներով՝ Սպիտակ տան հատուկ դեսպանորդ Սթիվ Ուիթքոֆը և Թրամփի փեսան՝ Ջարեդ Քուշները, հինգշաբթի կմեկնեն Կատար՝ վարչապետի հետ Իրանի հարցով բանակցություններ վարելու համար։
Նրանք այժմ մտադիր են վերադառնալ Մայամի, այլ ոչ թե հանդիպել իրանցիների հետ։
