Ուժեղ եւ երկարատեւ ձյան պատճառով որոշ փոփոխություններ են կատարվել Հայաստանից մեկնող գնացքների չվացուցակում: Ջաջուռ-Մայիսյան հատվածում ստեղծված ծանր պայմանների պատճառով փետրվարի 10-ին հետաձգվել է Երեւան-Թբիլիսի գնացքի մեկնումը Երեւան կայարանից: Գնացքի ուղեւորները, որոնք Երեւանից պետք է մեկնեին 22:35-ին փետրվարի 10-ին, ստիպված էին գիշերել վագոններում: Ուղեւորների համար պայմաններ են ստեղծվել, իսկ վագոնները լրացուցիչ ջեռուցվել են:
Երեւան-Թբիլիսի գնացքը «Երեւան» կայարանից մեկնել է այսօր` 9:00-ին:
Առատ ձյան պատճառով փետրվարի 10-ին ժամը 16:00-ին խախտվել էր նաեւ Վանաձոր-Գյումրի էլեկտրագնացքի չվացուցակը: Մաքրման աշխատանքներից հետո գնացքի տեղաշարժը վերականգնվել է, սակայն նշված երկաթուղային հատվածը կրկին պատվել է ձյունով:
Ամբողջ գիշեր Հայաստանի ԱԻՆ աշխատակիցների հետ համատեղ, մաքրման աշխատանքներ են կատարել նաեւ «Հարավկովկասյան երկաթուղի» ընկերության աշխատակիցները: Ներկայումս ձյան մաքրման աշխատանքները շարունակվում են Ջաջուռ-Մայիսյան հատվածում: