Հայաստանը Մոսկվայի պլացդարմն է Կովկասի կենտրոնում: Այս մասին նշվում է Stratfor հետազոտական կենտրոնի` Հարավային Կովկասին նվիրված հոդվածում: «Ռուսաստանի վերածնունդ» խորագրի ներքո կենտրոնը հոդվածներ է հրապարակում Ռուսաստանի եւ նախկին ԽՍՀՄ հանրապետությունների հարաբերությունների մասին:
Միաժամնակ` Stratfor-ի վերլուծաբանները նշում են, թե Հայաստանը Ռուսաստանի համար բուֆերային գոտի է Կովկասում:
«Հայաստանը Մոսկվայի համար պլացդարմ է ծառայում Կովկասի կենտրոնում, քանի որ սահմանակից է ինչպես Ադրբեջանի եւ Վրաստանի, այնպես էլ Թուրքիայի եւ Իրանի հետ: 2012թ-ին Ռուսաստանի հիմնական նպատակը Հայաստանի համար Միասնական տնտեսական տարածքում եւ Եվրասիական միությունում հնարավոր ինտեգրացիայի նախապատրաստումն է»,-նշվում է հոդվածում:
Փորձագետների խոսքով` Ռուսաստանը Հայաստանի վրա ազդելու քաղաքական, տնտեսական լծակներ ունի: «Մոսկվան աջակցում է նախագահ Սերժ Սարգսյանին եւ կառավարող Հանրապետական կուսակցությանը, սակայն կապեր ունի նաեւ նախկին նախագահներ Լեւոն Տեր-Պետրոսյանի եւ Ռոբերտ Քոչարյանի հետ»,-ենթադրում են կենտրոնի փորձագետները` նշելով, որ հաշվի առնելով աշխարհագրական դիրքը եւ ռազմավարական կարեւորագույն ռեսուրսների բացակայությունը, Հայաստանը որպես ազդեցիկ հովանավոր ընտրել է Ռուսաստանին, որը վերահսկում է երկրում ենթակառուցվածքների մեծ մասը:
«Իհարկե, ԱՄՆ-ում եւ Ֆրանսիայում գոյություն ունի ազդեցիկ հայ համայնք, սակայն նրանց ներգրավվածությունն ավելի շատ տնտեսական բնույթ ունի, քանի որ Հայաստանը Ռուսաստանի ուղեծրում է, ոչ թե նախկին ԽՍՀՄ արեւմտամետ ճամբարի մասը: Բացառությամբ Ռուսաստանի աշխարհաքաղաքական դիրքի թուլացման` մնացած սցենարների դեպքում Հայաստանը, ինչպես ակնկալվում է, հետագայում եւս հավատարիմ կմնա Մոսկվային եւ կշարունակի մասնակցություն ունենալ Կրեմլի տարածաշրջանային նախաձեռնություններին»,- եզրակացնում են Stratfor-ի վերլուծաբանները: