Թեեւ Ֆրանսիայի Սահմանադրական խորհրդում ցեղասպանությունների ժխտման քրեականացման օրինագծի վերանայման հետ կապված արտաքին քաղաքականության իրադարձություններին եւ Հայոց ցեղասպանության մոտալուտ տարելիցին, առաջիկա երկու ամիսներին Հայաստանի համար ամենակարեւոր իրադարձությունը կլինեն սպասվող խորհրդարանական ընտրությունները: Այս մասին փետրվարի 27-ի մամլո ասուլիսում հայտարարել է քաղաքագետ, Կովկասի ինստիտուտի տնօրենի տեղակալ Սերգեյ Մինասյանը:
Ըստ փորձագետի` հայ հասարակությունը նախընտրական պայքարի գործընթացի զարգացման սպասման մեջ է: «Վերջին երկու ամիսների ընթացքում Հայաստանի ներքին քաղաքական կյանքում բազմաթիվ փոփոխություններ են տեղի ունեցել, սակայն գործընթացը դեռեւս չի ավարտվել: Առաջիկա շաբաթների ընթացքում ազդեցիկ կուսակցություններն իրենց համագումարների ժամանակ հստակ կարտահայտեն խորհրդարանական ընտրությունների վերաբերյալ իրենց դիրքորոշումը, եւ քաղաքական իրավիճակը կպարզվի: Արդեն պարզ է դարձել, թե ինչպիսի նախընտրական քաղաքական բլոկներ կձեւավորվեն, եւ ինչպես կընթանան դեպքերը», - ասել է նա:
Պատասխանելով հարցին, թե տվյալ պահին քաղաքական դաշտում ով է ֆավորիտ համարվում եւ ով հնարավորություն ունի խորհրդարանում հայտնվելու, Միասյանը նշեց Հայաստանի հանրապետական կուսակցությանը, կոալիցիոն «Բարգավաճ Հայաստան» կուսակցությանը եւ ընդդիմադիր Հայ ազգային կոնգրեսին: «Ժառանգություն» կուսակցության դեպքում ամեն ինչ կախված է նրանից, թե այդ կուսակցությունը ինչպես կներկայանա ընտրություններին` մենակ, թե գաղափարապես մոտ կանգնած մեկ այլ ուժի հետ: «Օրինաց երկիր» կուսակցության վիճակն այնքան էլ հստակ չէ կուսակցական ցուցակներով ընտրություններին. հնարավոր է, այն խորհրդարանում կներկայանա միայն մեծամասնական կարգով ընտրված պատգամավորներով: Ինչ վերաբերում է ՀՅԴ Դաշնակցությանը, այս կուսակցությունը կանցնի խորհրդարան ի շնորհիվ իր կայուն ընտրազանգվածի:
Պատասխանելով NEWS.am-ի հարցին, թե ինչպես է նա գնահատում խորհրդարանական ընտրությունների վերաբերյալ սոցիոլոգների կանխատեսումները, եթե հաշվի առնենք, որ տվյալ փուլում խորհրդարանական տեղերին հավակնող կուսակցությունների դասավորվածությունը դեռ հստակ չէ, Մինասյանն ասաց. «Հայաստանում 2-3 մասնագիտացված խմբեր կան, որոնք կարող են քաղաքական իրավիճակի սոցիոլոգիական վերլուծություն կատարել, եւ նույնիսկ դրսի պատվերով վիճակագրական հարցումներ իրականացնող կազմակերպությունները պետք է օգտագործեն մասնագիտացած այդ խմբերի տվյալները: Ելնելով բարոյագիտական նորմերից` ես չեմ հստակեցնի, թե խոսքն ում մասին է: Նշեմ, որ խորհրդարանական ընտրություններին առնչվող վիճակագրական բոլոր ուսումնասիրությունները տվյալ պահին այսպես կոչված PR-ի մաս են կազմում: Որոշ քաղաքական ուժեր նպատակահարմար են գտնում նման վիճակագրական հարցումները շրջանառելը, որպեսզի դասավորվածության մասին հստակ պատկերացում ստեղծեն»:
Քաղաքագետի խոսքով` չնայած որ Հայաստանում սոցիոլոգիան, իբրեւ քաղաքական գիտություն, զարգացածներից մեկն է, դժբախտաբար, այդ ոլորտում մասնագիտացած կազմակերպություններն այնքան էլ շատ չեն:
