Վարչապետ Տիգրան Սարգսյանը շնորհավորական ուղերձ է հղել Վլադիմիր Պուտինին` Ռուսաստանի Դաշնության նախագահի պաշտոնում ընտրվելու կապակցությամբ:
Ուղերձում ասված է.
«Հարգելի Վլադիմիր Վլադիմիրի,
Հայաստանի Հանրապետության կառավարության եւ անձամբ իմ անունից շնորհավորում եմ Ձեզ` Ռուսաստանի Դաշնության նախագահի պաշտոնում ընտրվելու կապակցությամբ:
Վստահ եմ, որ բաց եւ արդար պայքարում Ձեր տարած համոզիչ հաղթանակն ամուր հիմք է Ձեր ընտրած ուղու բարեհաջող իրագործման համար: Ընտրությունների արդյունքներն այն փաստի վկայությունն են, որ Ռուսաստանի եղբայրական ժողովուրդը լի է հասարակության հետագա վերափոխման եւ երկրի արդիականացման ճանապարհով շարժվելու համար անհրաժեշտ ներուժով եւ վճռականությամբ:
Համոզված եմ նաեւ, որ մեր պետությունների միջեւ առկա ռազմավարական գործընկերությունը նոր լիցք կստանա` զարգանալով մեր տնտեսությունների հետագա ինտեգրման ճանապարհով՝ ժամանակի թելադրանքին եւ սրընթաց փոփոխվող աշխարհի պահանջներին համապատասխան:
Մաղթում եմ Ձեզ, Վլադիմիր Վլադիմիրի, նախանշված բոլոր գաղափարների իրականացում եւ նորանոր ձեռքբերումներ Ձեր պատասխանատու եւ դժվարին պաշտոնում»:
Նշենք, որ կիրակի` մարտի 4-ին ՌԴ-ում կայացած նախագահական ընտրություններում Պուտինը հավաքել է ընտրողների մոտ 64 տոկոսը:
