Հայաստանի Տավուշի մարզի սահմանային դիրքերում, այսօր` մարտի 19-ին, հակառակորդի գնդակից սպանված 35-ամյա Արտակ Շահբազյանը, հրազենային վնասվածք ստանալուց հետո, Նոյեմբերյան քաղաքի հիվանդանոց տեղափոխվելիս արդեն եղել է հոգեւարքի մեջ: Այս մասին NEWS.am-ի Տավուշի թղթակցի հետ զրույցում նշեց Նոյեմբերյանի բժշկական կենտրոնի տնօրեն Աշոտ Գյոզալյանը:
«Նա ստացել էր կրծքավանդակի ձախ կեսի հրազենային միջանցիկ թափանցիկ վիրավորում: Քանի որ հիվանդը արագ մահացավ, չկարողացանք պարզել, թե էլ ինչն էր վնասված»,-ասաց նա, հավելելով. «Ներքին թափանցիկ վիրավորում, հոգեւարքային վիճակ, տրավմատիկ-հեմոռագիկ շոկ ծանր աստիճանի»:
Աշոտ Գյոզալյանի փոխանցմամբ, 35-ամյա տղամարդն այդ վիճակում կարողացել է հիվանդանոցում ապրել 5 րոպե:
Հիշեցնենք, որ այսօր` մարտի 19-ին, ժամը 14:20-ի սահմաններում Տավուշի մարզի սահմանային դիրքերում հակառակորդը խախտելով հրադադարի ռեժիմը, դիպուկահարի կողմից արձակված կրակոցով մահացու վիրավորվել էր Արարատ քաղաքի բնակիչ, 35-ամյա Արտակ Շահբազյանին, ով հիվանդանոցում ստացած վնասվածքից րոպեներ անց մահացել էր:
Նշենք, որ Արտակ Շահբազյանը գումարտակի հրամանատար էր, կոչումով` մայոր: