Համաշխարհային մեծության փոփ աստղ Մադոննան պատասխանել է լրագրողուհի եւ գրող, լեսբուհի Մաշա Գեսենին, որը կոչ էր արել հրաժարվել ամռանը Սանկտ-Պետերբուրգում նախատեսված ելույթից: Կոչի պատճառ է դարձել Սանկտ-Պետերբուրգի աղմկահարույց նոր օրենքը, որը, մասնավորապես նախատեսում է տուգանք անչափահասների շրջանում նույնասեռականություն քարոզելու համար:
Մադոննան, որը պետք էօգոստոսի 9-ին ելույթ ունենար Պիտերում, աշխարհին վաղուց եւ քաջ հայտնի է ոչ միայն որպես երգչուհի, այլեւ որպես սեռական փոքրամասնությունների իրավունքների ակտիվ պաշտպան: Մարիա Լուիզա Չիկոնեն (այդպիսին է երգչուհու իսկական անունը) համարվում է ողջ գեյ-խորհրդանիշներից խոշորագույնը: Այնպես որ «Աշխարհի շուրջ» ամսագրի գլխավոր խմբագրի կոչը հենց նրան ավելի քան հիմնավորված էր:
Նմանապես հիմնավորված է նաեւ Մադոննայի որոշումը նշանակված համերգը չհետաձգելու մասին: Սակայն նա խոստացել է հանդես գալ պիտերյան գեյերի պաշտպանությամբ:
Facebook-ի իր էջի գրառման մեջ Մադոննան գրել է, որ Սանկտ Պետերբուրգ կգա, որպեսզի խոսի գեյ-հանրության անդամների հետ, օգնի նրանց, ուժ տա եւ ոգեշնչի բոլորին, ով ճնշված է կամ իրեն այդպես է զգում: Սակայն գեյերը պրիմադոննայի խոսքերը երկերեսանի են համարել: Սլավոնական գեյ շքերթի կազմակերպչական հանձնաժողովը որոշում է կայացրել Մոսկվայում եւ Սանկտ Պետերբուրգում երգչուհու համերգների ընթացքում երկու հանրային ակցիա անցկացնելու վերաբերյալ, որպեսզի «երկերեսանի արեւմտյան աստղերի ուշադրությունը հրավիրեն ընդհանուր խնդրի վրա», հայտնում է «Իզվեստիան»:
Մինչդեռ, ինչպես հայտնում է «Կոմսոմոլսկայա պրավդան», գեյ քարոզչության արգելքի մասին օրենքի հեղինակ Վիտալի Միլոնովն սպառնացել է փոփ աստղին տուգանքներով, եթե նա զբաղվի նույնասեռականության քարոզչությամբ հենց բեմից:
Նա հայտարարել է, որ անձամբ է գնալու համերգ, եւ եթե հենց Մադոննան կամ համերգի կազմակերպիչներից որեւէ մեկը խախտեն նոր օրենքը, նրանք կպատժվեն, երգչուհուն կտուգանեն 5 հազար ռուբլով, իսկ կազմակերպիչները կարող են կորցնել մինչեւ կես միլիոն ռուբլի:
Մադոննայի համերգաշարի կազմակերպիչները հայտարարել են, որ Մադոննայի շոուին ուրախ կլինեն տեսնել Վիտալի Միլոնովին, եթե նա տոմս գնի:
