ԱՄՆ-ի բանակի սերժանտ Ռոբերտ Բեյլսին պաշտոնապես մեղադրանք է ներկայացվել աֆղանցի 17 խաղաղ բնակիչների կանխամտածված սպանությունների համար: Մեղադրյալին կարող են դատապարտել մահապատժի:
Մարտի 11-ին 38-ամյա զինծառայողը աֆղանական Քանդահար նահանգում սպանել էր 9 երեխաների եւ 8 մեծահասակների եւ փորձել էր այրել զոհվածների մարմինները:
Աֆղանստանում ԱՄՆ-ի բանակի իրավաբանական խորհրդատուն անանուն մնալու պայմանով Associated Press-ին հայտնել է, որ կանխամտածված սպանությունը պարտադիր չէ ծրագրել երկար ժամանակ, եւ դա կպնդի մեղադրող կողմը: Նվազագույն պատիժը, որը կարող է սպառնալ Բեյլսին ցմահ բանտարկությունն է` ներման իրավունքով: Առավելագույնը զինված ուժերի շարքերից վռնդելն է, մրցանակներից եւ կոչումներից զրկելը եւ մահապատիժը:
Այնուամենայնիվ, փորձագետները չեն կարծում, թե Ռ. Բեյլսին մահապատժի կենթարկեն: ԱՄՆ-ի բանակը 1961թ.-ից ի վեր մահապատիժ չի կիրառել:
Մեղադրյալի փաստաբանը հայտարարում է, որ իր պաշտպանյալը գրեթե ոչինչ չի հիշում մարտի 11-ի գիշերվա դեպքերից: Բացի այդ, իրավաբանը մամուլի ուշադրությունն է հրավիրել այն բանի վրա, որ մեղադրող կողմն ապացույցներ չունի, մասնավորապես` զենքի վրա մատնահետքեր չկան:
