Մոհամեդ Մերայի ավագ եղբայր Աբդելքադերին եւ նրա ընկերուհուն Թուլուզից տեղափոխել են Փարիզ քաղաքի արվարձանի ոստիկանության հակաահաբեկչական բաժանմունք:
Թուլուզում Մոհամեդ Մերային վնասազերծելու հատուկ գործողության ընթացքում հաղորդվել էր, որ ոստիկանները բռնել են երեք անձի` կասկածյալի մորը, ինչպես նաեւ նրա եղբորը եւ եղբոր ընկերուհուն:
«Թուլուզյան հրաձիգի» մայրը կարող է ազատվել հենց այսօր` մարտի 24 -ին, իսկ նրա եղբորն ու ընկերուհուն կարող են պահել մինչեւ մարտի 25-ը, քանի որ ահաբեկչության կասկածանքով բռնելու դեպքումօրենսդրությունը թույլատրում է մինչեւ 96 ժամ պահել կալանքի տակ: Հետաքննությունը ձգտում է պարզել հանցագործություններին Մոհամեդ Մերայի եղբոր մասնակցության աստիճանը, չնայած նրա այն հայտարարությանը, որ միանգամայն անտեղյակ է եղել եղբոր հանցավոր մտադրություններին:
Մեղադրանք ներկայացվելու դեպքում ձերբակալվածները կկանգնեն Փարիզի դատարանի առջեւ, քանի որ հենց մայրաքաղաքային դատախազն է վարում հետաքննությունը, հաղորդում է «ՌԻԱ Նովոստին»` հղում անելով AFP-ին:
Մոհամեդ Մերան ալժիրական ծագմամբ ֆրանսիացի է, որն սպանել է յոթ մարդու, այդ թվում` երեք երեխաների: Նա սպանվել է երկօրյա հատուկ գործողությունների ընթացքում: Մերան ավելի վաղ ոստիկանությանը հայտարարել էր, որ Աֆղանստանում եւ Պակիստանում պատրաստականություն է անցել միջազգային ահաբեկչական «Ալ Կաիդա» ցանցի ճամբարներում:
