«Ա-2» ՍՊԸ-ն մշակել է գազի արդյունաբերական հաշվիչների նոր կորեկտորներ: Այդ մասին NEWS.am-ի թղթակցին հայտնել է ձեռնարկության Վանաձորի մասնաճյուղի ղեկավար Արկադի Խիտարովը: 2012 թվականի հուլիսից, հիշեցրել է նա, «ՀայՌուսգազարդ» ՓԲԸ-ն որոշում է ընդունել էլեկտրոնային կորեկտորները պարտադիր դարձնելու մասին: «Դրանից ելնելով` մենք մտադիր ենք շուկա դուրս բերել նոր կորեկտորները հին մեխանիկականների փոխարեն», - հայտարարել է Ա. Խիտարովը:
Ըստ նրա` ձեռնարկությունը նախագծել է նաեւ կորեկտորների հեռակառավարման վերահսկողության համակարգը: «Մի քանի կորեկտորներ կարող են կառավարվել մի վահանակից, որով կարելի կլինի հետեւել ցանկացած կետի», – բացատրել է նա:
Կենցաղային կորեկտորների համար, ավելացրել է նա, պատվեր է ստացվել Վրաստանից, որտեղ «Ա-2»-ը ներկրել է 200-300 սարքեր: Ընկերության սարքերը տեղադրվել են նաեւ Հայաստանի գազաբաշխիչ համակարգում: Ընկերությունը նաեւ թողարկում է էլեկտրաէներգիայի հաշվիչներ եւ համագործակցում է Հունաստանի մետրոլոգիական համակարգի հետ` նրանց եվրոպական սերտիֆիկացման համար:
Ընկերությունը կորեկտորների համար կազմում է ծրագրային ապահովում, ինչպես նաեւ նախագծում է պլատաներ եւ տեղադրում ռադիոալեհավաքներ տվյալների փոխանցման համար: «Պլատաները մենք պատվիրում ենք Չինաստանում, քանի որ տեղում, դժբախտաբար, չենք կարողանում արտադրող գտնել, որը կարող է աշխատել այդքան փոքր չափերով եւ այդքան հասանելի», – բացատրել է Ա. Խիտարովը: Այժմ ձեռնարկությունը վերանայում է փոքր արտադրողական գծի գնման նախագծեր` փորձնական եւ քիչ քանակությամբ արտադրության համար: «Քիչ ֆինանսավորում է պահանջվում, մոտավորապես 200 հազար եվրո, որպեսզի տեղում փորձարկումներ կատարվեն նոր պլատաների հետ, այլ ոչ թե նրանք «կուրորեն» նախագծվեն», – բացատրել է Ա. Խիտարովը:
Կորեկտորների ցուցմունքները կփոխանցվեն ծախսաչափերին, որոնց համար «Ա-2»-ը ծրագրային պլատֆորմ է մշակել պլանշետների համար: «Այնտեղ մենք կարող ենք ներդնել նաեւ այնպիսի գործառույթ, ինչպիսին գազի սպառումը հաշվող տարբեր համակարգերի սինխրոնիզացումն է: Ամբողջ ծրագիրը կտեղադրվի մոդուլում, որը հնարավոր կլինի պլանշետին միացնել USB-ով: Միակ բարդությունը Android օպերացիոն համակարգի այժմյան մոդելների հետ համատեղելն է:
Android նորագույն մոդելների վրա կարելի է տեղադրել մեր ծրագիրը, սակայն նրանք դեռեւս բավականին հասանելի չեն, եւ այն ներառել ինքնարժեքի մեջ մեզ համար ավելի դժվար է: Այդ պատճառով էլ մեր մշակածի համատեղելիությունը Android-ի հետ կապահովի հայկական «Instigate» ընկերությունը», – ավելացրել է Ա. Խիտարովը: Մշակվել է եւս մեկ տարբերակ` ծրագրի տեղադրումը ամերիկյան պատրաստի մոդուլի վրա` նրանում ամրագրված Windows XP-ով:
«Ա-2» ՍՊԸ-ի մասնաճյուղը, որն ստեղծվել է «Ավտոմատիկա» ԳՀԸ-ի հիման վրա, զբաղվում է նախագծմամբ, հավաքմամբ եւ ենթակառուցվածքների կառավարման եւ տվյալների փոխանցմանսարքերի փորձարկմամբ: Ընկերությունը նախատեսում է արտադրությանը կից բացել ուսումնական կենտրոն` ուսանողների մասնագիտական պատրաստության համար:
