Ռուսական ավիացիոն իշխանություններն, այսօր` մարտի 26-ին, միակողմանի կարգով արգելել են բելառուսական ավիափոխադրողներին թռիչքներ կատարել Մոսկվա: «Բելավիա» ավիաընկերությունը վաղ առավոտյան ծանուցում է ստացել, որ Մոսկվա կատարվող թռիչքների թույլտվությունն անվավեր է ճանաչվել: Ի պատասխան Բելառուսը հետ է կանչել Մինսկ կատարվող թռիչքների թույլտվությունը բոլոր ռուսական փոխադրողներից:
Ավելի ուշ Մինսկի եւ Մոսկվայի միջեւ ավիահաղորդակցման արգելքը հանվել էր մինչեւ մարտի 29-ը: Այդ օրը նախատեսված են բանակցություններ այդ հարցով: Համապատասխան ձեւով է արձագանքել նաեւ բելառուսական կողմը , հայտնում է «Ինտերֆաքսը»:
Վեճի պատճառն այն է, ինչպես հայտնել են Բելառուսի տրանսպորտի նախարարությունում, որ ռուսական կողմն ուզում է ունենալ կոմերցիոն առավելություն իր ավիաընկերությունների համար, այսինքն թույլտվություն ստանալ Մինսկ կատարվող թռիչքների մեծ քանակության համար:
Դա ԻՏԱՌ-ՏԱՍՍ-ին հաղորդել են նաեւ Մոսկվայի աղբյուրները: Մասնավորապես, ըստ նրանց, բելառուսական ավիաիշխանությունները ռուսական «Աերոֆլոտի» հետ չեն համաձայնեցրել երրորդ ամենօրյա չվերթի իրականացումը:
Ռուսաստանից Բելառուս են թռչում «Աերոֆլոտ` ռուսական ավիաուղիներ», «Սիբիր» (S7 Airlines) եւ«Յուտեյր», ինչպես նաեւ «Տրանսաերոն», որը թռչում է «Բելավիա» բելառուսական ավիաընկերության համաձայնությամբ եւ նրա ինքնաթիռներով: