«Թուլուզյան հրաձիգի» հայրը մտադիր է Ֆրանսիայի դեմ հայց ներկայացնել որդու սպանության համար:
Բենալել Մոհամեդ Մերան հայտնել է, որ պատրաստ է փաստաբաններ վարձել եւ աշխատել իր մնացած ամբողջ կյանքում, որպեսզի վճարի նրանց ծառայությունների համար: Ըստ Մերա ավագի` ֆրանսիական հատուկ նշանակության փորձառու ջոկատն իր որդուն ողջ թողնելու հնարավորություն ունեցել է, օրինակ` հատուկ գազ կիրառելով, հայտնում է «Էխո Մոսկվին»: Նա հայտարարել է, որ հատուկ նշանակության ջոկատին պարզապես ձեռնտու է եղել իր որդուն սպանելը:
23-ամյա ալժիրցի Մոհամեդ Մերան, որի ձեռքով Ֆրանսիայի հարավում զոհվել են յոթ մարդ, սպանվել էր նրան վնասազերծելու հատուկ գործողության ընթացքում: Արդեն հարձակման ավարտից հետո Ֆրանսիայի նախագահ Նիկոլա Սարկոզին հայտարարել էր, որ ամեն ինչ արվել էր Մոհամեդ Մերային արդարադատությանը հանձնելու համար:
Նշենք, որ Մոհամեդ Մերան փաստացի մեծացել է առանց հոր: Բենալել Մոհամեդ Մերան ընտանիքը թողել է Թուլուզում եւ վերադարձել է Ալժիր, երբ տղան հինգ տարեկան է եղել: Մայրը մենակ է դաստիարակել հինգ երեխաներին ` երեք որդուբ եւ երկու դուստրերին:
