2013 թվականին Մոսկվան եւ Վաշինգթոնը առաջընթացի կհասնեն Եվրոպայում ՀՀՊ-ի խնդրի լուծման հարցում: Նման հույս է հայտնել ԱՄՆ-ի նախագահ Բարաք Օբաման Սեուլում լրագրողների հետ հանդիպման ժամանակ` միջուկային անվտանգության գագաթաժողովի շրջանակներում:
«Առաջիկա 9-10 ամիսների ընթացքում փորձագետները կաշխատեն ՀՀՊ-ի տեխնիկական կողմի վրա, որը համարվում է մեր վեճերի հիմնական պատճառը: 2013 թվականին հնարավոր կլինի հասնել առաջընթացի, եթե լուծվեն տեխնիկական հարցերը», - հայտարարել է Օբաման, հաղորդում է «ՌԻԱ Նովոստին»:
Ընդ որում ԱՄՆ-ի նախագահը նշել է, որ նախատեսվում է կարգավորել շատ բարդ հարցեր, նա պետք է Պենտագոնի, Կոնգրեսի եւ երկու կուսակցությունների հետ խորհրդակցություն անցկացնի, եւ դրա համար ժամանակ է հարկավոր: Նա նաեւ հիշեցրել է, որ ԱՄՆ-ում մի քանի ամիս անց տեղի կունենան նախագահական ընտրություններ, այդ պատճառով տվյալ պահին այս հարցերը շատ դժվար է լուծել:
Հիշեցնենք, որ Ռուսաստանի նախագահ Դմիտրի Մեդվեդեւը Սեուլում Օբամայի հետ հանդիպումից հետո հայտարարել էր, որ Ռուսաստանը եւ ԱՄՆ-ն հակահրթիռային պաշտպանության հարցում մնում են նախկին դիրքորոշմանը, սակայն պայմանավորվելու ժամանակ դեռեւս կա: Ըստ Մեդվեդեւի` նրանք պայմանավորվել են, որ այժմ հատուկ տեխնիկական փորձագետների աշխատանքի ժամանակն է: