News
Լրահոս
News
Ուրբաթ
Մարտ 29
Տեսնել լրահոսը

Դատարանն ապացուցված է համարել անձանց պոռնկության շահագործմանը օժանդակելու, թմրամիջոցի ապօրինի իրացնելու եւ ապօրինի կերպով սառը զենք պահելու համար Ա. Միքայելյանին առաջադրված մեղադրանքները եւ դատապարտել երկարատեւ ազատազրկման:

Դատախազության մամուլի ծառայությունից NEWS.am-ին հայտնում են, որ նախաքննությամբ պարզվել եւ հիմնավորվել է, որ 2010թ. ամռանից Ա. Միքայելյանը որոշակի վարձատրության դիմաց, որպես թիկնապահ ծառայություն մատուցելով Հ. Դավթյանին, ամենօրյա հսկողություն է սահմանել վերջինիս կողմից խաբեությամբ պոռնկության շահագործման նպատակով հավաքագրված եւ շահագործված  Ն. Մ.-ի, Ս. Ս.-ի եւ Լ. Կ.-ի նկատմամբ:

Տեղյակ լինելով Հ. Դավթյանի կողմից Ն. Մ.-ի եւ Ս. Ս.-ի կյանքի եւ առողջության համար վտանգավոր բռնություն գործադրելու մասին` Ա. Միքայելյանը ավտոմեքենայով պարբերաբար կայանելով տուժողների բնակության վայրում,  նրանց տեղաշարժերի մասին տեղեկացրել է Հ. Դավթյանին, հաճախորդների հետ հանդիպման գնալիս հաճախակի նրանց ուղեկցել է, իսկ հետո դիմավորել` նրանց անվտանգությունն ապահովելու նպատակով: Այդկերպ Ա. Միքայելյանը մինչեւ 2010թ. նոյեմբերի 28-ն օժանդակել է Հ. Դավթյանի կողմից վերոհիշյալ անձանց պոռնկության շահագործմանը:

Ապացուցվել է նաեւ, որ Ա. Միքայելյանը 2010թ. պատրաստել է մարիխուանա տեսակի թմրամիջոց` կանեփի թփից քաղած տերեւները մանրացնելու միջոցով, եւ ստացված թմրամիջոցը նույն թվականի հոկտեմբեր ամսին հյուրասիրելու եղանակով ապօրինի իրացրել է Հ. Դավթյանին, Ն. Մ.-ին, Ս. Ս.-ին եւ Լ. Կ.-ին:

Բացի այդ, Ա. Միքայելյանը ձեռք է բերել եւ 2010թ. նոյեմբերի 28-ին կրել սառը զենք հանդիսացող դանակ:

Մինչդատական վարույթում ձեռք բերված ապացույցների հիման վրա Հ. Դավթյանը խաբեությամբ, հետագայում ամուսնանալու կեղծ խոստումով,  պոռնկության շահագործման նպատակով հավաքագրել է Ն. Մ.-ին, նրան ներգրավել պոռնկության մեջ եւ տիրացել վերջինիս կողմից մարմնավաճառությամբ վաստակած գումարներին: Բացի այդ, ապացուցվել է նաեւ, որ Հ. Դավթյանը  բռնաբարել է Լ. Կ.-ին:

Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավճռով Ա. Միքայելյանը հանցավոր է ճանաչվել ՀՀ քրեական օրենսգրքի 38-132-րդ հոդվածի 2-րդ մասի 1-ին եւ 4-րդ կետերով,  266-րդ հոդվածի 1-ին մասով, 235-րդ հոդվածի 4-րդ մասով եւ ՀՀ քրեական օրենսգրքի 66-րդ հոդվածի կարգով պատիժ նշանակել ազատազրկում` 8 տարի ժամկետով:

2011թ. հունիսի 17-ի կրկնակի հանձնաժողովային դատաբժշկական փորձաքննության արդյունքների համաձայն` Հ. Դավթյանը տառապում է ձախ քունքածոծրակային բլթերի արտերիո-վենոզ մալֆարմացիա, կայուն մնացորդային երեւույթներ տարած ներուղեղային ինքնաբուխ պարենխիմատոզ-սուբարախնոիդալ արյունազեղումից հետո աջակողմյան չափավոր հեմիպարեզ եւ մասնակի սենսո-մոտոր աֆազիա, ցնցումային համախտանիշ հիվանդություններով, ուստի նա չի կարող մասնակցել քրեադատավարական գործողություններին:

Հ. Դավթյանի մասով որոշում է կայացվել որպես խափանման միջոց կալանավորումը վերացնելու մասին, իսկ 2012թ. փետրվարի 2-ին որոշում է կայացվել քրեական գործով վարույթը ՀՀ քրեական դատավարության օրենսգրքի 31-րդ հոդվածի 1-ին մասի 4-րդ կետով կասեցնելու մասին:

Տուժողների անունները փոխված են:

Տպել
Ամենաշատ