Արեւմուտքում թերահավատորեն են վերաբերվել ՄԱԿ-ի եւ ԱՊԼ-ի հատուկ ներկայացուցիչ Քոֆի Անանի առաջարկած կարգավորման ծրագիրը Դամասկոսի կողմից ընդունվելու մասին հայտարարությանը: ԱՄՆ-ի պետքարտուղար Հիլարի Քլինթոնը հայտարարել է, որ Սիրիայի ղեկավար Բաշար Ասադին պետք է դատել ոչ թե խոսքերով, այլ` գործերով:
«Հաշվի առնելով ավելի շատ խոստանալու եւ չափազանց քիչ կատարելու Ասադի միտումը` նրա ներկայիս հայտարարությունները պետք է ապացուցվեն անմիջական գործողություններով», - ասել է Քլինթոնը եւ ավելացրել, որ եթե Ասադն իսկապես պատրաստ է փակել Սիրիայի պատմության այդ մռայլ էջը, նա կարող է կառավարական ուժերին հրամայել անմիջապես դադարեցնել քաղաքների հրաձգությունը եւ դուրս բերել զորքերը խիտ բնակեցված շրջաններից:
Ավելին, ԱՄՆ-ի արտաքին քաղաքականության գերատեսչության ղեկավարը հայտարարել է, որ Ասադը պետք է նախապատրաստվի իշխանության ժողովրդավարական փոխանցմանը: Իսկ սիրիական ընդդիմության ներկայացուցիչներն, ըստ նրա, պետք է հանդես գան միասնական դիրքորոշմամբ եւ առաջադրեն նոր Սիրիայի իրենց տեսակետը, որը նրանք կցանկանան կառուցել, հաղորդում է BBC-ի ռուսական ծառայությունը:
Միաժամանակ, սիրիական ընդդիմադիր խմբերի ներկայացուցիչները Ստամբուլի հանդիպման ընթացքում Ասադի կառավարությանը կոչ են արել տանկերը դուրս բերել քաղաքներից եւ ՄԱԿ-ի բանաձեւի ընդունման մասին հայտարարությունների լրջություն ցուցաբերել: Ընդ որում, Ասադի հակառակորդները պատրաստ չեն ընդունել ոչ մի նախագիծ, որը գործող իշխանության պահպանման հնարավորություն է ընձեռում:
Ստամբուլյան հանդիպմանը մասնակցած խմբերի մեծամասնությունը համաձայն է եղել Սիրիական ազգային ընդդիմադիր խորհուրդը ճանաչել որպես սիրիական ժողովրդի պաշտոնական ներկայացուցիչ:
Սակայն Ստամբուլի հանդիպումը ցույց տվեց նաեւ սիրիական ընդդիմության ներքին հակասությունները. տարբեր խմբերի ներկայացուցիչներն անընդհատ վիճում էին միմյանց հետ եւ հերթով լքում էին նիստերի դահլիճը` ի նշան բողոքի:
