Ամերիկյան լրատվամիջոցներին հասու են դարձել 10 կիլոտոննա հզորությամբ միջուկային ռումբի պայթյունի հետեւանքների մասին գաղտնի զեկույցի բացահայտումները:
Զեկույցի համաձայն` պայթյունը 45 հազար մարդու կյանք կխլի, վիրավորների թիվը կարող է գերազանցել 320 հազարը:
Փորձագետները դիտարկել են սցենարը, որում պայթյունը տեղի է ունենում Սպիտակ տան մոտ: Այդ դեպքում զանգվածային ավերածությունները տեղի կունենան հիպոկենտրոնից մոտավորապես մեկ կմ տրամագծով: Եթե Սպիտակ տունն իրադարձությունների նման զարգացման դեպքում կոչնչանա, ապա ԱՄՆ-ի Կոնգրեսի, Գերագույն դատարանի, Պենտագոնի շենքերը աննշան ավերումների կենթարկվեն` կոտրված ապակիների եւ այլ մանր վնասվածքների տեսքով, հայտնում է «Էխո Մոսկվի» ռադիոն:
Նման պայթյունի դեպքում միջուկային «սնկի» բարձրությունը կկազմի 8 կմ, այն տեսանելի կլինի մի քանի րոպեի ընթացքում` հարյուրավոր կմ հեռավորության վրա: Ըստ գնահատման` պայթյունից երկու ժամ անց ռադիոակտիվ տեղումները կդադարեն:
Հիպոկենտրոնից ոչ շատ հեռու ճառագայթման հզորությունը կկազմի 300-800 ռենտգեն, որը կհանգեցնի այնտեղ գտնվող համարյա բոլոր մարդկանց մահվանը: