Աֆղանական բանտերում է գտնվում մոտ 400 կին եւ աղջիկ, ովքեր իրենց պատիժը կրում են այսպես կոչված բարոյական հանցանքի համար, մասնավորապես տնից փախչելու կամ ամուսնուց հեռանալու համար: Այդ մասին ասված է Human Rights Watch կազմակերպության զեկույցում:
Կանայք մեծամասամբ հեռացել են իրենց ամուսիններից, քանի որ վերջիններս բռնություն են կիրառել կանանց դեմ, իսկ աղջիկները փախել են իրենց ծեծող հայրերից, կամ էլ հարկադրական ամուսնությունից:
Ինչպես գրում է «Իզվեստիա»-ն, բանտում գտնվում են չամուսնացած կանայք, ովքեր բանտում են հայտնվել արտամուսնական սեռական հարաբերություններ ունենալու համար, նույնիսկ այն դեպքում, եթե նրանց բռնաբարել են: Շատ կանանց ստիպել են մարմնավաճառությամբ զբաղվել:
