Երեւանի տարբեր վարչական շրջաններում բնակիչների դռներն են թակում տարբեր կուսակցություններից ներկայացուցիչներ եւ հարցնում անուն, ազգանուն, գրանցում անձնագրային տվյալներ եւ հետաքրքրվում, թե ում են ընտրելու մայիսի 6-ին կայանալիք խորհրդարանական ընտրություններին:
Իսկ երբ լսում են ոչ իրենց ներկայացրած կուսակցության անվանումը, հուսահատ մի փորձ են անում` խնդրելով բնակիչներին հնարավորություն տալ մտնել տուն, զրուցել նրանց հետ: Այս մասին NEWS.am-ը բազմաթիվ ահազանգեր է ստացել բնակիչներից: Մարդկանց տան դռները թակողները նաեւ տարբեր տեսակի խոստումներ են տալիս, ընդհուպ մինչեւ գումարային տեսքով ընտրակաշառքների մասին:
«Ոնց որ «Եվհովայի վկաներ» լինեն, դրանցից էլ բեթար են, նրանք դեռ կուլտուրական են, որ ասում ես` չէ, հասկանում են, սրանք շատ համառ են, ամեն գնով ուզում են ներս գան, համոզեն»,- բարկացած պատմեց մեր ընթերցողներից 40-ամյա Լյուդմիլան:
NEWS.am-ն ահազանգեր ստացել է նաեւ մարզերից: Այնտեղ եւս մեկնարկել են դռներ թակելու, հեռախոսազանգերով մարդկանց քաղաքական կողմնորոշումները ճշտելու, նաեւ անձնագրի տվյալներ հավաքելու մարաթոնը: Ավելին, նախընտրական շտաբները արդեն ձեռնամուխ են եղել Երեւանում սովորող մարզերի ուսանողներին իրենց իսկ տրամադրած ավտոբուսով մայիսի 6-ին մարզ տեղափոխելու գործի կազմակերպմանը, որպեսզի նրանք մասնակցեն ընտրության:
Երեւանի պետական համալսարանի իրավագիտության ֆակուլտետի Սահմանադրական իրավունքի ամբիոնի դոցենտ Էդգար Շաթիրյանը NEWS.am-ի թղթակցի հետ զրույցում ասաց, որ բնակիչները բոլոր իրավական հիմքերը ունեն իրենց անկոչ հյուրերին ներս չթողնելու, հարցերին չպատասխանելու, առավել եւս` անձնագրային տվյալները չտրամադրելու եւ ընտրելիք թեկնածուին կամ կուսակցությանը չբացահայտելու համար:
«Այստեղ անձի անձեռնմխելիության խնդիր կա, որ չի կարելի մուտք գործել անձի բնակարան առանց դատարանի թւոյլտվության, որեւէ ընտրող պարտավոր չէ բացահայտել իր քաղաքական կողմնորոշումները, քվեարկության գաղտնիության սկզբունք կա, առավել եւս` անձնագրային տվյալները վերցնելու, տվյալ ընտանիքում ընտրողների քանակը ճշտելու իրավասություն ոչ ոք չունի»,- նշեց իրավաբանը, հավելելով, որ չկա որեւէ ատյան, որին քաղաքացին հնարավորություն կունենա դիմել «կուսակցություններից» իրեն պաշտպանելու համար:
«Նախընտրական քարոզչությունը դեռ չի մեկնարկել, հետեւաբար որեւէ թեկնածուի, կուսակցության կամ դաշինքի չես կարող մեղադրել նախընտրական քարոզչության սահմանված կարգը խախտելու համար: Դա չի կարող լինել նաեւ նախընտրական շրջանում, որովհետեւ թեկնածուների համար հավասար հնարավորություններն ես խախտում, մյուս կողմից` ընտրողների կամքի ազատ արտահայտման վրա ուղղակիորեն կամ անուղղակիորեն ներգործություն է տեղի ունենում»,- նշեց նա:
Ի դեպ, ընտրողի կամքի ազատ իրականացմանը խոչընդոտելը սահմանված է Քրօրի 154.2 հոդվածով, որում նշվում է, որ թեկնածուներից որեւէ մեկի օգտին կողմ կամ դեմ քվեարկելու, ընտրություններին մասնակցելու կամ ընտրություններին մասնակցելուց հրաժարվելու պայմանով թեկնածուներից անձամբ կամ միջնորդի միջոցով կաշառք ստանալը` (տալը) պատժվում է տուգանքով` նվազագույն աշխատավարձի 500-ապատիկից 700-ապատիկի չափով, կամ ազատազրկմամբ` 1-3 տարի ժամկետով (տալու դեպքում` նվազագույն աշխատավարձի 2000-ապատիկից 2500-ապատիկի չափով, կամ ազատազրկմամբ` 3-5 տարի ժամկետով)»:
Իսկ Ընտրական օրենսգրքի 18-րդ հոդվածի 7-րդ կետում նշվում է, որ նախընտրական քարոզչության ժամանակ, ինչպես նաեւ քվեարկության նախորդ եւ քվեարկության օրը թեկնածուներին, կուսակցություններին, կուսակցությունների դաշինքներին արգելվում է անձամբ կամ նրանց անունից կամ որեւէ այլ եղանակով ընտրողներին անհատույց կամ արտոնյալ պայմաններով տալ (խոստանալ) դրամ, սննդամթերք, արժեթղթեր, ապրանքներ կամ մատուցել (խոստանալ) ծառայություններ:
Նշենք, որ ընտրարշավը մեկնարկում է ապրիլի 8-ին, իսկ խորհրդարանական ընտրությունները կկայանան մայիսի 6-ին:
