JetBlue ավիաընկերության օդաչու Քլեյթոն Օսբոնին, որի մեղքով Նյու Յորք - Լաս Վեգաս չվերթի ինքնաթիռն արտակարգ վայրէջք է կատարել Թեքսասում, մեղադրանք է ներկայացվել օդանավի անձնակազմի աշխատանքը խաթարելու համար: Ըստ ԱՄՆ-ի քրեական օրենսգրքի համապատասխան հոդվածի` օդաչուին սպառնում է 20 տարվա ազատազրկում, հայտնում է «Իզվեստիան»:
Այժմ անձնակազմի հրամանատարը գտնվում է թեքսասյան Ամարիլո քաղաքի հիվանդանոցում, որտեղ նա պետք է բժշկական համակողմանի հետազոտություն անցնի:
Ըստ ականատեսների ցուցմունքների` Օսբոնը թռիչքից 4 ժամ անց թեքվել է իր գործընկեր օդաչուի կողմը եւ ասել. «Մենք Լաս Վեգաս չենք թռչի», իսկ այնուհետեւ վազել է ինքնաթիռի սրահ եւ սկսել գոռալ, որ ինքնաթիռում ռումբ կա, եւ այն ենթարկվել է «Ալ Կաիդայի» հարձակմանը: Անձնակազմի եւ ուղեւորների ջանքերով հրամանատարին հանգստացրել են, իսկ ինքնաթիռը հարկադիր վայրէջք է կատարել Թեքսասում: