Ֆրանսիայում Ցեղասպանության ժխտման քրեականացման գործընթացը շարունակվում է` անկախ նախագահական ընտրությունների ելքից: Այսօր` մարտի 29 -ին, լրագրողներին նման կարծիք է հայտնել Հայաստանի Գիտությունների ազգային ակադեմիայի Արեւելագիտության ինստիտուտի տնօրեն Ռուբեն Սաֆրաստյանը:
Ըստ նրա` հարցի էվոլյուցիային հետեւում են մի քանի երկրներ, եւ եթե Ֆրանսիան ընդունի օրինագիծը, ապա բացառված չէ, որ նրան միանան եվրոպական մի քանի երկրներ:
Ըստ նրա` հայ ուսումնասիրողները, որոնք մասնակցել են «Թուրքական գործոնը Մերձավոր Արեւելքում եւ հետխորհրդային տարածաշրջանում» կոնֆերանսին, որը տեղի էր ունեցել մարտի 21-ին Մոսկվայում, ռուսական կողմին կոչ էին արել միանալ այդ գործընթացին: Եվրոպան, ավելացրել է նա, այդ ուղղությամբ մի քայլ առաջ է գնում` ցեղասպանության ճանաչումից անմիջապես հետո սահմանվում է դրա ժխտման համար պատասխանատվություն:
Հիշեցնենք, որ Ֆրանսիայի Սենատը նման օրինագիծ էր ընդունել հունվարի վերջին, սակայն փետրվարին հանրապետության Սահմանադրական խորհուրդն այն մերժել էր Սահմանադրությանն անհամապատասխան լինելու պատճառաբանությամբ:
Այնուամենայնիվ, նման օրինագիծ կազմել են խոստանում երկու թեւերի նախագահի թեկնածուները` աջ թեւից Նիկոլա Սարկոզին, ձախից` Ֆրանսուա Օլանդը:
