Պաղեստինցիները կազմակերպել են «Միլիոնների երթ դեպի Երուսաղեմ»: Չնայած ոչ բռնի ակցիա անցկացնելու բոլոր խոստումներին, Արեւելյան Երուսաղեմում, Հորդանանում եւ Սամարիայում, ինչպես նաեւ Գազայի հատվածում տեղի են ունեցել ցուցարարների եւ Իսրայելի անվտանգության ուժերի դաժան բախումներ, հայտնում է MIGnews.com-ը:
Անկարգություններն սկսվել են անմիջապես ուրբաթօրյա աղոթքից հետո` Երուսաղեմից հյուսիս գտնվող Քալանդիայի մոտ:
Դիմակներով պաղեստինցիներն սկսել են ՑԱԽԱԼ-ի ուժերին քարկոծել, այրել են մեքենաների անվադողեր:
ՑԱԽԱԼ-ն ի պատասխան միջոցներ է կիրառել ցույցը ցրելու համար: Պաղեստինցիները հայտարարել են արցունքաբեր գազից տուժած 30 ցուցարարների մասին: Պաղեստինյան հայտնի քաղաքական գործիչ Մուսթաֆա Բարգութին գլխի վնասվածք է ստացել` արցունքաբեր նռնակի հարվածից:
Պաղեստինցիների նետած քարերից մեկը դիպել է ՀԱՄԱՍ-ի պատգամավոր Ահմեդ Աթունի գլխին, որը վերջերս էր արտաքսվել Երուսաղեմից:
Խռովարար պաղեստինցիներին հանգստացնելու համար ՑԱԽԱԼ-ը կիրառել է Scream աղմկարար համակարգ, որը բարձր հաճախականությամբ ձայն է արձակում, ինչպես նաեւ Skunk ջրցան համակարգ:
Ռաքելի դամբարանի մոտ պաղեստինցիները փորձել են Երուսաղեմ ներխուժել, սակայն կանգնեցվել են ՑԱԽԱԼ-ի ուժերի կողմից: