Լիբանանի նախագահ Միշել Սուլեյմանը ընդունել է հայ մտավորականության ներկայացուցիչներ բանասիրական գիտությունների դոկտոր Նորայր Ադալյանին եւ ՀՀ արվեստի վաստակավոր գործիչ Լեւոն Մութաֆյանին, ինչպես նաեւ Բեյրութի «Ծաղիկ» հանդեսի խմբագրապետ Ասպետ Ռուբինյանին: Նախագահի հետ հանդիպմանը մասնակցում էին նաեւ Լիբանանի պետական երեսփոխան Շանթ Չինչինյանը եւ Լիբանանում Հայաստանի Հանրապետության դեսպանատան առաջին քարտուղար Վարդան Ադամյանը:
Հանդիպման ընթացքում Նորայր Ադալյանը եւ Լեւոն Մութաֆյանը Լիբանանի նախագահին ներկայացրել են հայ-լիբանանյան մշակութային կապերը: Լեւոն Մութաֆյանը նախագահին է փոխանցել Հայաստանի սփյուռքի նախարար Հրանուշ Հակոբյանի ողջույնը եւ նվիրել «Անի 1050» գիրքը: Նվերն ընդունելով` Լիբանանի նախագահը նշել է, որ տպավորված է նախարար Հրանուշ Հակոբյանի հետ ունեցած հանդիպումից: Իր հերթին գրող Նորայր Ադալյանը նախագահ Միշել Սլեյմանին հանձնել է իր «Սեւ քառակուսի կարմիր անապատում» վեպը, որն արժանացել է ՀՀ նախագահի մրցանակին:
Նախագահ Միշել Սուլեյմանը հայ մտավորականներին հայտնել է, որ Հայաստան կատարած իր այցի ժամանակ նախագահ Սերժ Սարգսյանի հետ քննարկել են հայ-լիբանանյան փոխգործակցության հարցեր, իսկ աշնանը Սերժ Սարգսյանի Լիբանան կատարելիք այցի ժամանակ քննարկման նյութ կդառնան տնտեսական համագործակցության հարցերը:
Նշենք, որ հայ մտավորականության ներկայացուցիչները Բեյրութում էին գտնվում հայ տպագրության 500-ամյակի եւ հայ մեծ բանաստեղծ Եղիշե Չարենցի 115-ամյակի տոնակատարությունների առիթով:
