Հայաստանի Կենտրոնական ընտրական հանձնաժողովը գրանցել է համամասնական ընտրակարգով ընտրություններին մասնակցելու հայտ ներկայացրած բոլոր քաղաքական ուժերին:
ԿԸՀ-ն այսօր` ապրիլի 1-ին կայացած արտահերթ նիստում որոշում է կայացրել գրանցել «Բարգավաճ Հայաստան», «Օրինաց երկիր», «Ժառանգություն», Հ. Յ. Դաշնակցություն, Հանրապետական, «Միավորված Հայեր», Հայաստանի Դեմոկրատական եւ Հայաստանի Կոմունիստական կուսակցությունները, ինչպես նաեւ «Հայ Ազգային կոնգրես» դաշինքը:
Ըստ ԿԸՀ սահմանած ժամանակացույցի, այսօր ժամը 18:00-ին ավարտվում է կուսակցությունների համամասնական ցուցակների գրանցման ժամկետը: Ապրիլի 8-ից մեկնարկելու է պաշտոնական քարոզարշավը: Իսկ խորհրդարանական ընտրությունները Հայաստանում կայանալու են մայիսի 6-ին:
