Կառավարության որոշմամբ անվճար տրամադրվող թափուկը շատ հաճախ անտառապետերի կողմից բնակիչներին տրամադրվում է գումարով, կամ օգտագործվում է որպես ընտրակաշառք: Այս խնդիրների շուրջ NEWS.am-ը զրուցել է «Հայանտառ» ՊՈԱԿ-ի տնօրեն Մարտուն Մաթեւոսյանի հետ:
Պարոն Մաթեւոսյան, ինչպիսի՞ վիճակ է այսօր Հայաստանի անտառներում, արդյոք նվազո՞ւմ է ապօրինի անտառահատումների եւ անտառօգտագործողների թիվը:
Զուտ վիճակագրական տվյալներով, 2011թ-ին շատ փոքր նվազում կա, արձանագրված ապօրինի անտառահատումների գործում, բայց վերջին մեկ-երկու տարիների ընթացքում կապված գազի գնի բարձրացման հետ, որոշակիորեն ավելացել է ապօրինի անտառօգտագործումը: Մինչեւ նախորդ տարվա կառավարության որոշումը` թափուկ փայտանյութի ձրի տրամադրման վերաբերյալ, նույնիսկ թափուկ վառելիք հավաքելը համարվում էր ապօրինի անտառօգտագործում: Ընդհանուր Հայաստանի մասշտաբով շատ քիչ նվազում է արձանագրվել, կարծում ենք կառավարության այս որոշումը բավականաչափ կօգնի, որպեսզի նվազի ապօրինի անտառհատումը:
Ահազանգեր կան, որ կառավարության որոշմամբ անվճար տրամադրվող թափուկը անտառապետերը գումարով են տրամադրում, Դուք նման ահազանգեր ստացե՞լ եք:
Դա արդեն հանցագործություն է, բայց մենք տեղյակ չենք: «Հայանտառը» թափուկ փայտանյութի համար վճար չի վերցնում, իրենք իրավունք չունեն:
Գյուղատնտեսության նախարարը նշեց, որ ամենաշատ անտառահատումները Լոռիի մարզում են, ի՞նչն է պատճառը, գուցե անտառտնռտեսությունները լավ չե՞ն աշխատում:
Դեռ 90-ականներից սկսած անտառհատում ամենաշատը Լոռիում է կատարվել, քանի որ անտառներն այստեղ ավելի հասանելի են, իսկ 2000թ-ից սկսած մեծածավալ անտառվերականգնման աշխատանքներ են իրականացվել: Իհարկե, այստեղ նաեւ անտառտնտեսության մեղքը թույլ պահպանությունն է, անբավարար աշխատանքը: Կան խոցելի տարածքներ` Վահագնիի, Եղեգնուտի եւ Փամբակի անտառտնտեսությունները, որտեղ չի եղել մի աշխատակից, որի վրա քրեական գործ հարուցված չլինի եւ նստած չլինի: Հիմա շուրջ 13 պահաբաժին ազատ է, մարդիկ չեն ուզում գալ ու աշխատել, քանի որ տեխնիկական ապահովվածությունը գտնվում է վատ վիճակում:
Հ.Գ. Նշենք, որ NEWS.am-ի Լոռիի թղթակցի հավաստի տեղեկություններով անատառամերձ համայնքերի մի շարք բնակիչներ անտեղյակ լինելով իրենց իրավունքներից, մասնավորապես, որ 2011թ-ի նոյեմբերի մեկից փայտանյութը տրամադրվում է անվճար, ողջ ձմեռ թափուկ վառելիքը ձեռք են բերել մեկ խմ-ի համար վճարելով նույն 1200 դրամը, իսկ ահա գյուղնախարար Սերգո Կարապետյանն էլ Լոռիի մարզ այցելած ժամանակ հայտարարեց, որ մի շարք համայնքներում էլ դա օգտագործվում է որպես ընտրակաշառք: Նախարարը խոստացել է գտնել եւ պատժել նմաններին:
Հարցազրույցը` Էդվարդ Արզումանյանի
Լուսանկարները` հեղինակի
