Մաշտոցի պուրակում կրպակների ապամոտաժման նախաձեռնող խումբը նամակով դիմել է Հայաստանի ոստիկանապետ Վլադիմիր Գասպարյանին, որտեղ պահանջում է չխոչընդոտել իրենց` կրպակներն ապամոնտաժելու ժամանակ:
Նամակում, մասնավորապես, ասվում է.
«Մաշտոցի պուրակում ինքնակամ կառուցված շինությունների դեմ երիտասարդության պայքարը գնալով ավելի է կարեւորվում մեր հանրության կողմից: Պետական իշխանության մարմինների անզօրությունը վերացնել ստեղծված անօրինական դրությունը առաջացնում է Երեւանի համայնքի բազմաթիվ անդամների արդար եւ ողջամիտ դժգոհությունը:
Տեղեկացնում ենք Ձեզ, որ մարտի 31-ին, ժամը 13:00-ից Մաշտոցի պուրակում անօրինական կառուցված տաղավարների ապամոնտաժման աշխատանքներ կատարելու մտադրություն ունեցող անձանց ապրիլի 2-ին միանում են հետեւյալ քաղաքացիները.
1. Ավագյան Մարիամ - կենսաֆիզիկոս
2. Զուրաբյան Նիկիտա - տեխ.գիտ.թեկնածու
3. Կալենչյան Կարո - ինժիներ, տեխ.գիտ. թեկնածու
4. Համբարյան Արսեն - գրող, երգահան, երգիչ
5. Մեսրոբյան Հարություն – կառավարման փորձագետ
6. Մինասյան Հայկ - ֆիզիկոս
7. Մնեյան Լալա - Հայաստանի ժողովրդական վարպետ
8. Յազիճյան Գեւորգ - լրագրող, հրապարակախոս
9. Ֆրանգուլյան Երվանդ - երաժիշտ
Ապամոնտաժման աշխատանքներն իրականացնելու համար օգտագործվելու են հետեւյալ գործիքները.
1. էլեկտրական սրիչ (բոլգարկա) RTR Rother N. S.N. ELS 101-0192-0732 - 1 (մեկ) հատ,
2. պտուտակահան STAREX – 12 (տասներկու) հատ,
3. հարթաշուրթ KLY-TEK 160mm - 5 (հինգ) հատ,
4. ճոպան կտրող գործիք STAREX – 2 (երկու) հատ,
5. դուր ORIENT – 2 (երկու) հատ,
6. ապակի բրնող գործիք SUCTIONCUP – 4 (չորս) հատ
7. անլար պտտուկահան ELK 418 RTR ROTHER – 1(մեկ )հատ
Ապոմոնտաժումը նախատեսված է իրականացնել կազմակերպված եղանակով, առանց հասարակակ կարգը խախտելու, մասնագիտական մեթոդներով եւ գործիքներով, առանց սեփականատիրոջ գույքին վնաս պատճառելու։ Հաշվի առնելով, որ ոստիկանությունը ներկա դրությամբ իրականացնում է Մաշտոցի Պուրակում տաղավարների պահպանությունը.
ՊԱՀԱՆՋՈՒՄ ԵՆՔ
1. Ապահովել վերը նշված ՀՀ քաղաքացիների ազատ մոտեցումը տաղավարներին` դրանց ապամոնտաժման աշխատանքները կատարելու համար:
2. Ապամոնտաժման աշխատանքների ժամանակ ապահովել հասարակական կարգի պահպանությունը եւ աշխատանքներ իրականացնող անձանց անվտանգությունը»:
