Ուկրաինայի գլխավոր դատախազ Վիկտոր Պշոնկոն թույլ է տվել նախկին վարչապետ Յուլյա Տիմոշենկոյին բուժել Կաչանովի գաղութի սահմաններից դուրս, որտեղ նա գտնվում է այժմ:
Նման որոշում է ընդունվել Յուլյա Տիմոշենկոյի խմբակցության պատգամավորների դիմումի քննարկումից հետո, որոնք մարտի 23-ին հանդիպել էին գաղութի ղեկավարության հետ, հայտնում է BFM.ru-ն:
Բանտային պետական ծառայությանը եւ Ուկրաինայի առողջապահության նախարարությանը հանձնարարական է տրվել ապահովել դատապարտյալի զննումն ու բուժումը գաղութի պատերից դուրս: Նախօրեին ուկրաինական եւ գերմանական լրատվամիջոցները հաղորդել էին, որ երկու երկրների ներկայացուցիչները բանակցություններ են վարում Տիմոշենկոյին Գերմանիայում բուժելու խնդրի շուրջ: Բեռլինյան հիվանդանոցներից մեկը համաձայնել է ընդունել նախկին վարչապետին:
Charite կլինիկայի բժիշկներն արդեն հետազոտել են բանտարկյալին ուղղիչ հաստատությունում:
