Ուկրաինայի նախկին վարչապետ Յուլյա Տիմոշենկոյին մտադիր են բուժման համար ուղարկել Խարկովի «Ուկրերկաթուղի» հիվանդանոց: Այդ մասին ասվում է Ուկրաինայի առողջապահության նախարարության հաղորդագրությունում:
Համաձայն հաղորդագրության` հիվանդանոցի նյութատեխնիկական բազան լիովին համապատասխանում է գերմանացի մասնագետների ներկայացրած եւ Ուկրաինայի առողջապահության նախարարության բժշկական հանձնաժողովի մասնագետների հետ համաձայնեցված պահանջներին, հաղորդում է vesti.ru-ն:
Հիշեցնենք, ավելի վաղ գլխավոր դատախազ Վիկտոր Պշոնկան Տիմոշենկոյին Կաչանովի ուղղիչ գաղութից դուրս մասնագիտացված բժշկական հաստատությունում բուժում ստանալու թույլտվություն էր տրամադրել:
Անցնող շաբաթվա վերջում Ուկրաինայի գլխավոր դատախազի տեղակալ Ռենատ Կուզմինը նշել էր, որ Կիեւում քննարկում են Տիմոշենկոյին Գերմանիայում բուժելու հավանականությունը:
