Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը համաձայն չէ ՏՄՊՊՀ 2011 թվականի գործունեության վերաբերյալ Հայաստանի մարդու իրավունքների պաշտպան Կարեն Անդրեասյանի օրերս հրապարակած գնահատականին:
Այս մասին Արտակ Շաբոյանը հայտնեց NEWS.am-ի թղթակցի հետ հարցազրույցում, որը ներկայացնում ենք ստորեւ:
Պրն. Շաբոյան, ինչպե՞ս եք գնահատում օմբուդսմենի եզրակացությունը ՏՄՊՊՀ գործունեության մասին:
Հայաստանի Մարդու իրավունքների պաշտպանի եզրակացությունը մեր մասով օբյեկտիվ չէ, իսկ ուսումնասիրությունը` ոչ լիարժեք: Մենք այդ քննադատությունը չենք ընդունում: Բացի քննադատելուց` Պաշտպանը նաեւ պետք է օգնի պետական կառույցներին: Այս ժամանակահատվածում ոչ մի խնդիր, ոչ մի առարկայական բողոք չի ներկայացրել մեր Հանձնաժողովին: Ես, անկեղծ ասած, զարմացած եմ այդ զեկույցում տեղ գտած եզրակացություններից: Օրինակ` նշվել է ժամկետանց սննդի մասին, բայց միթե մարդու իրավունքների պաշտպանի գրասենյակը տեղեկացված չէ, որ դա մեր դաշտում չի գտնվում, սննդի անվտանգության համար առաջին հերթին այլ գերատեսչություններ են պատասխանատու:
Թերեւս ավելի մանրամասնենք: Զեկույցում ՏՄՊՊՀ-ին քննադատում են այն բանի համար, որ տնտեսվարող սուբյեկտները բողոքարկում են ՏՄՊՊՀ որոշումները, իսկ դատական երկար գործընթացների ընթացքում քայլեր չենք ձեռնարկում օրինախախտ տնտեսվարողների դեմ` սպասելով դատական գործընթացների ավարտին:
Մեր մոտեցումը հետեւյալն է` պատժելն ու տուգանք նշանակելը ինքնանպատակ չէ, կարեւորը խախտման փաստի վերացումն է, բացի այդ` ցանկանում ենք տնտեսվարողին հնարավորություն տալ` պաշտպանել իրենց իրավունքները: Մեր նպատակը տնտեսվարողներին ոչնչացնելը չէ, ճիշտ է`փորձում ենք հիմնավոր որոշումներ կայացնել, բայց չի բացառվում, որ մենք էլ մեր որոշումներում սխալվենք: Տնտեսվարողներին հնարավորություն ենք տալիս իրենց իրավունքները պաշտպանել ամբողջությամբ, եթե ցանկություն ունեն դիմել դատարան` թող դիմեն: Միայն դատական վերջնական վճռի կայացումից հետո, երբ արդեն համոզվում ենք, որ դատական համակարգը համամիտ է մեր որոշման հետ, համապատասխան միջոցներ ենք ձեռնարկում: Այս սկզբունքը կիրառում ենք բոլորի նկատմամբ, մեզ մոտ երկակի ստանդարտներ չկան:
Օմբուդսմենը հատկապես նշել էր «Ալեքս Գրիգի» կողմից ուկրաինական օղիների նմանակման դեպքը:
Շատ լավ օրինակ է: Միայն մեկ տարվա ընթացքում «Ալեքս Գրիգին» օղիների մասով տուգանեցինք 10 անգամ: Օրենքով սահմանված առավելագույն տուգանքն ենք նշանակել, որն արդեն վճարվել է: Խնդիրն այդ օղիները շրջանառությունից հանելն է, բայց դա մեր լիազորություների շրջանակից դուրս է: Ճիշտ է` մենք որոշում ենք կայացրել, բայց պարտադրել չենք կարող: Դատարանը հօգուտ մեզ վերջնական որոշում կայացրեց, մոտ 20 օր առաջ ստացանք այդ որոշումը ու անմիջապես ուղարկեցինք ՀՀ արդարադատության նախարարության դատական ակտերի հարկադիր կատարման ծառայություն, որպեսզի այդ պարտադրանքը լինի:
Օմբուդսմենի մյուս քննադատությունը կապված էր ոչ թափանցիկ ու ոչ հրապարակային գործելաոճի հետ:
Այդ քննադատությունն ինձ համար առնվազն զարմանալի էր: Ես կարծում եմ` մենք այնքան թափանցիկ ու հրապարակային ենք, որ գոնե Պաշտպանը նման որակում չպետք է տար: Հատկապես այն որոշումները, որոնք առնչվում են սպառողների շահերի պաշտպանության հետ, դրանք բոլորը հրապարակային ենք կայացնում` լրատվամիջոցների, մեղադրվող կողմի ներկայությամբ: Դա նույնպես բավականին լուրջ խնդիր է` մենք տնտեսվարողների դեմ հրապարակային մեղադրանքներ ենք ներկայացնում, ու ընդհանրապես` մեր գործունեությունը լայնորեն լուսաբանվում է:
Նշվել է նաեւ, որ ձեր ինտերնետային կայքում բավարար տեղեկատվություն չկա:
Այդ եզրակացությունը կարդալուց հետո անձամբ ստուգեցի մեր ինտերնետային պաշտոնական կայքէջը: Ոչ միայն ամբողջությամբ վիճակագրությունն էր ներկայացված, այլեւ մեր հաշվետվությունները, գործունեության տարեկան ծրագրերը: Մանրամասն ներկայացված են մեր բոլոր կայացրած որոշումները, նկարագրված են վարույթները:
Զրուցեց` Սամվել Ավագյանը