Հազիվ թե Հայաստանում որեւէ մեկը պատրանք ունի, թե Ադրբեջանը կատարելու է իր խոստումները: NEWS.am-ի թղթակցի հետ զրույցում նման կարծիք հայտնեց ռուսաստանցի քաղաքագետ, Սեւծովյան-Կասպյան տարածաշրջանի քաղաքական եւ սոցիալական հետազոտությունների ինստիտուտի աշխատակից Անդրեյ Արեշեւը` մեկնաբանելով Ադրբեջանի ներկայացուցիչների հակասական հայտարարությունները:
Հիշեցնենք, որ նախօրեին Ադրբեջանի արտգործնախարար Մամեդյարովը հայտարարել էր, թե Բաքուն պատրաստ է միջադեպերի հետաքննման մեխանիզմների ստեղծման միայն այն դեպքում, եթե «հայկական զորքերը սկսեն լքել Ադրբեջանի օկուպացված տարածքները»: Նման մեխանիզմների ստեղծման անհրաժեշտության մասին խոսվում է Հայաստանի, Ռուսաստանի եւ Ադրբեջանի նախագահների հայտարարություններում, որոնք ընդունվել են 2011թ. մարտին եւ 2012թ. հունվարին Սոչիում:
Քաղաքագետի խոսքով, հայատրարությունների հակասությունը պայմանավորված է նրանով, որ մի կողմից փաստաթուղթ է ստորագրվում, մյուս կողմից ռազմատենչ հայտարարություններ են արվում բարոյահագեբանական ճնշման նպատակով: Հայտարարությունը հատուկ նշանակություն է ստանում հունիսի 18 –ին Փարիզում Հայաստանի եւ Ադրբեջանի արտգործնախարարների հանդիպման համատեքստում: Ընդհանուր առմամբ, քաղաքագետի կարծիքով, այս հակասությունն ավելին չէ, քան մեդալի երկու կողմերը: «Նմանատիպ հայտարարություններ հնչում են մշտապես»,-եզրափակեց Արեշեւը: