«Թռչող Վալենդա» կրկեսային հայտնի դինաստիայի յոթերորդ սերնդի ներկայացուցիչ Նիք Վալենդան կատարել է հնարք, որը վերջին անգամ կատարվել էր ավելի քան հարյուր տարի առաջ: Ձողը ձեռքին նա կտրել անցել է Նիագարայի ջրվեժի վրայով անցկացված մետաղալարը:
«Զբոսանքը» տեւել է 25 րոպե: Քանի որ Նիագարայում ուշ երեկո էր, մետաղալարը բոլոր կողմերից լուսավորվել է հզոր լույսերով: Ըստ նախնական գնահատականների` անցումը դիտել են մի քանի միլիոն հանդիսականներ:
«Հիասքանչ տեսարան»,- բացականչել է լարախաղացը ճանապարհի կեսին: Ամենամեծ խոչընդոտը եղել են, ըստ նրա, ուժեղ ցայտքերը, որոնք դժվարացրել են տեսանելիությունը, եւ մշտական քամին:
Վալենդան հենց կանադական հող է մտել, նրան խնդրել են ցույց տալ անձնագիրը, որպեսզի պաշտոնապես գրանցեն նրա ժամանումն այլ երկիր: Անցման ընթացքում լարախաղացն այն պահել է տոպրակում` անդրավարտիքի առջեւի գրպանում, որպեսզի չթրջի, հաղորդում է «vesti.ru»-ն:
Նա 6 ձեռքբերումներ ունի Գինեսի ռեկորդների գրքում, ընդ որում, լարի վրայով ամենաերկար անցումը կատարել է հեծանվով` առանց ապահովագրության:
Նիագարան 1859 թվականին առաջինը անցել է ֆրանսիացի կրկեսային հանրահայտ լարախաղաց Ժան Ֆրանսուա Գրավլեն: Վերջին անգամ լարախաղացը ջրվեժի վրայով անցել է 1910 թվականին, Սակայն հենց Վալենդան է անցում կատարել ջրվեժից այդքան մոտ հեռավորությունից: