Հայաստանի կառավարությունը նախաձեռնել է ՀՀ Ազգային Ժողովի արտահերթ նիստ: ՀՀ կառավարության այսօրվա` հունիսի 18-ի որոշմամբ, ՀՀ Ազգային Ժողովի նախագահին առաջարկվել է ՀՀ Ազգային ժողովի առաջին նստաշրջանի ավարտից անմիջապես հետո գումարել ՀՀ Ազգային ժողովի արտահերթ նստաշրջան:
Նշենք, որ ըստ «ՀՀ Ազգային Ժողովի կանոնակարգ» օրենքի` ՀՀ հինգերորդ գումարման Ազգային ժողովի առաջին նստաշրջանը սկսել է մայիսի 31-ին եւ կավարտվի օրակարգում ընդգրկված բոլոր հարցերը սպառելուց հետո: Օրակարգում ընդգրկված է 6 հարց` հաշվիչ հանձնաժողովի ընտրություն, ԱԺ նախագահի եւ տեղակալների ընտրություններ, մշտական հանձնաժողովների թվի, անվանումների եւ գործունեության ոլորտների հաստատում, մշտական հանձնաժողովների նախագահների ընտրություն եւ կառավարության գործունեության ծրագրի հավանություն տալու հարցը:
Առայսօր չեն քննարկվել մշտական հանձնաժողովների հետ կապված հարցերը, իսկ կառավարության ծրագրին հավանություն տալու հարցերը ներառվել են ԱԺ հունիսի 20-ի նիստի օրակարգում:
Արտահերթ նիստի օրակարգում կառավարություն առաջարկել է ընդգրկել մի շարք օրենքների նախագծեր ու միջազգային համաձայնագրեր: Հարցերից մեկը լինելու է Սեւանա լճից լրացուցիչ ջուր բաց թողնելու մասին առաջարկը: