Ոստիկանության վետերանների եւ Արաբկիրի բաժնի ծառայողների բացատրական աշխատանքների շնորհիվ, հունիսի 26-ին, ժամը 11.45-ին, ոստիկանության Երեւան քաղաքի վարչության հերթապահ մաս մի քաղաքացուց ահազանգ է ստացվել, որ ինքը նախկին ազատամարտիկ է եւ Մամիկոնյանց փողոցի թիվ 29 շենքի վերնամասում զենք է թողնում:
Ոստիկանության լրատվության վարչությունից հայտնում են, որ մեկնած օպերատիվ խումբը հիշյալ վայրում, ծառի տակ հայտնաբերել է առանց խզակոթի եւ համարի, կարճեցված փողով, 16 մմ տրամաչափի հարթափող որսորդական հրացան, «ՌԳԴ-5» տիպի նռնակ, նռնակի պայթուցիչ եւ տարբեր տրամաչափի 165 փամփուշտ:
Հայտնաբերվածն ուղարկվել է փորձաքննության, կատարվում է հետաքննություն:
Հունիսի 26-ին, ժամը 19.15-ին, ապօրինի զինամթերք պահելու կասկածանքով, ոստիկանության Անիի բաժնի ծառայողներն այցելել են 40-ամյա Տարիել Գ.-ի տուն: Նա ոստիկանության ծառայողների պահանջով ներկայացրել է «Ֆ-1» տիպի նռնակ` առանց պայթուցիչի, 5,45 մմ տրամաչափի 90 փամփուշտ եւ 12 պայթուցիչ ու հայտնել, որ զինամթերքը հանգուցյալ հայրը ձեռք էր բերել 1992-1994 թթ. ԼՂՀ պաշտպանական մարտերին մասնակցելու ժամանակ:
Նշանակվել է դատաձգաբանական փորձաքննություն, կատարվում է հետաքննություն: