Վերջին օրերին համացանցում որոշ օգտատերերի կողմից շրջանառվում է մի տեսանյութ՝ կապված «Լազերային տեխնիկա» գիտաարտադրական միավորման հիմնադիր եւ գլխավոր տնօրեն, ֆիզիկամաթեմատիկական գիտությունների դոկտոր, պրոֆեսոր Վիլիկ Հարությունյանի մահվան հանգամանքների հետ:
Իրավիճակի պարզաբանման խնդրանքով NEWS.am-ը դիմել է Վիլիկ Հարությունյանի դստերը՝ ֆիզիկամաթեմատիկական գիտությունների թեկնածու Կարինե Հարությունյանին:
«Ծանոթ եմ հորս մահվանն առնչվող այդ հրապարակմանը եւ անկեղծ վրդովված եմ, քանի որ այն որակում են որպես իմ ընտանիքի եւ անձամբ իմ վշտի շահարկում: Ցանկանում եմ հայտնել, որ նյութում ներկայացված հանգամանքները կեղծված են եւ չեն համապատասխանում իրականությանը: Հայրս մահվանից մի քանի ամիս առաջ առողջական խնդիրներ է ունեցել եւ մահացել է սրտի կաթվածից՝ 12 տարի առաջ: Հավելեմ, որ հայրս հայտնի ֆիզիկոս էր եւ սերտորեն համագործակցում էր պաշտպանության այն ժամանակվա նախարար Սերժ Սարգսյանի հետ: Հայրս Սերժ Սարգսյանին վերաբերվում էր խորը հարգանքով եւ ակնածանքով՝ եւ որպես ղեկավարի, եւ որպես անձի: Նրանց համատեղ ջանքերը ուղղված էին տնտեսական ճգնաժամի ժամանակաշրջանում «Լազերային տեխնիկա» ԳԱՄ-ի պահպանմանն ու զարգացմանը: Հասկանում եմ, որ նախընտրական շրջանում տարբեր մարդիկ պատրաստ են չկանգնել ոչնչի առաջ, այնուամենայնիվ խնդրում եմ չքննարկել եւ տգեղ քաղաքական շահարկումների թեմա չդարձնել մեր ընտանիքի վիշտը՝ հորս կորուստը» ,- նշեց Կարինե Հարությունյանը:
Նշենք, որ համացանցում տեսանյութ է հայտնվել, որտեղ ամերիկաբնակ իրավապաշտպան Արա Մանուկյանը նշում է, թե «Լազերային տեխնիկա» գիտաարտադրական միավորման հիմնադիր ու գլխավոր տնօրեն Վիլիկ Հարությունյանի մահը կասկածելի հանգամանքներում է եղել, եւ այդ կապակցությամբ մի շարք հարցեր է հղում նախագահ Սերժ Սարգսյանին: