Ֆրանսիայի Դեսին քաղաքում, հոկտեմբերի 20-ին, բացվել է Հայկական հիշողության ազգային կենտրոնը: Միջոցառմանը մասնակցել են Ֆրանսիայի նախագահ Ֆրանսուա Օլանդի ներկայացուցչ՝ Մշակույթի եւ հաղորդակցության նախարար տիկին Օրելի Ֆիլիպետտին, Հայաստանի սփյուռքի նախարար Հրանուշ Հակոբյանը:
Միջոցառմանը հրավիրած են եղել հյուրեր ինչպես Ֆրանսիայի, այնպես էլ այլ երկրների հայ համայնքներից: Միջոցառման ընթացքում ելույթ-դասախոսություններով հանդես են եկել հայ եւ ֆրանսիացի գիտնականներ եւ մշակությաին գործիչներ:
Միջոցառումը շարունակվել է Դեսինի Ս. Աստվածածին եկեղեցում՝ Լիոնի ազգային նվագախմբի մասնակցությամբ:
Հայկական հիշողության ազգային կենտրոնի ստեղծմանը իրենց աջակցությունն են ցուցաբերել ոչ միայն Բուլլուկյան հիմնադրամը, այլեւ Լիոնի եւ Դեսինի տեղական ինքնակառավարման մարմինները՝ Մեծ Լիոնը, Ռոն-Ալպի շրջանը, Ռոնի ընդհանուր խորհուրդը, Դեսինի եւ Մեզիոյի քաղաքապետարանները:
Ինստիտուտը գործելու է որպես փաստավավերագրական կենտրոն, որտեղ պահվելու է 110 000 փաստաթուղթ եւ 12 000 գիրք: Պահպանվելու եւ ապագա սերունդներին են փոխանցվելու հայկական պատմությանն առնչվող նյութեր, ինչպես նաեւ Ֆրանսիայում եւ եվրոպական այլ երկրներում ապրող ու արարող հայ մշակութային գործիչների ստեղծագործությունները: Կենտրոնի մյուս կարեւոր նպատակն է՝ ֆրանսահայերի ազգային ինքնության պահպանումը, Ցեղասպանության եւ դրա հետեւանքների վերացման ուղղությամբ տարվող հետազոտությունների իրականացումը, ինչպես նաեւ ֆրանս-հայկական միջմշակութային կապերի զարգացումը եւ կենտրոնի միջոցով հայկական ժառանգության վերականգնումն ու հարստացումը:
Հայկական հիշողության ազգային կենտրոնի նախագահն է Ժյուլ Մարտիրոսյանը, տնօրենը՝ Կատիա Բուդոյանը: