Հայաստանում էլեկտրաէներգիան կթանկանա 3,85 դրամով, հունիսի 11-ին խորհրդարանում լրագրողներին հայտնել է Հանրային ծառայությունները կարգավորող հանձնաժողովի նախագահ Ռոբերտ Նազարյանը: Հիշեցնենք, ավելի վաղ նա հայտարարել էր, որ թանկացումն ուժի մեջ կարող է մտնել օգոստոսի 1-ից: Ըստ նրա՝ որոշումը կայացվելու է մոտ ապագայում՝ Հանձնաժողովի նիստում:
Ըստ նրա՝ Հանձնաժողովը մի քանի ամիս ուսումնասիրել է սակագինը բարձրացնելու վերաբերյալ ոլորտի բոլոր ընկերությունների դիմումները:
Հանրային ծառայությունները կարգավորող հանձնաժողովի Սակագնային քաղաքականության վարչության պետ Գարեգին Բաղրամյանը NEWS.am-ին հայտնել էր, որ նշված 3,85 դրամով կթանկանան վերջնական սակագները բաժանորդային բոլոր խմբերի համար:
Հիշեցնենք, որ բարձր լարում ունեցող բաժանորդների համար (35 կՎտ եւ ավելի) ցերեկային եւ գիշերային սակագինը այժմ կազմում է համապատասխանաբար 29 եւ 25 դրամ՝ մեկ կՎտ-ի համար, 6 (10) կՎտ-ի դեպքում՝ 35 եւ 25 դրամ, 0,38 կՎտ-ի դեպքում եւ բնակչության համար՝ 38 (9,2 ցենտ) եւ 28 դրամ (6,8 ցենտ):